Rossiyaning Suriya poytaxti Damashqdagi elchixonasi minomyotdan o‘qqa tutildi. Bu haqda Rossiya tashqi ishlar vazirligi ma’lum qildi, deya xabar bermoqda “TASS”.
Vazirlikning ma’lumot berishicha, elchixona hukumatga qarshi jangarilar joylashgan Jobar tumani tomonidan o‘qqa tutilgan. Minomyot snaryadi 20-sentabr, tongda elchixona hovlisiga tushib, yerga qadalgan, keyinchalik suriyalik sapyorlar tomonidan chiqarib olingan. Hozirda mazkur snaryad jangarilar qo‘liga qanday tushib qolgani aniqlanmoqda.
“Bu terrorchilik akti munosabati bilan halqaro hamjamiyat, jumladan, mintaqadagi tomonlarning aniq munosabatini kutamiz, — deyiladi vazirlik tomonidan tarqatilgan bayonotda. — Shu bilan birga, bu munosabat gap-so‘zlarda emas, harakatlarda o‘z aksini topishi kerak”.
Ta’kidlash joizki, bu Rossiya elchixonasining birinchi bor o‘qqa tutilishi emas: oxirgi marta bunday hodisa may oyida ro‘y bergan, o‘shanda bir mina elchixona darvozasidan 15 metr narida, ikkinchisi esa devorni teshib, ishchi kabinetga tushgan va baxtli tasodif bilangina qurbonlar bo‘lmagandi.
Izoh (0)