“Oryol i reshka. Shoping” ko‘rsatuvining O‘zbekistonga bag‘ishlangan soni 4-sentabr kuni “Pyatnitsa” telekanali orqali namoyish etildi. Ko‘rsatuv qator videoservislarga joylanib ulgurdi.
An’anaga ko‘ra, tanga tashlangach, ko‘rsatuv boshlovchilaridan biri Mariya Ivakova “oltin bank kartasi”, ikkinchisi — Anton Lavrentyev 100 dollar mablag‘ bilan xaridga otlandi.
Boshlovchilar O‘zbekistonning ikki qadimiy shahri — Samarqand va Buxoroda shoping qildi. Dastur davomida O‘zbekistonning qadimiy buyumlari, chunonchi, do‘ppi, chopon, so‘zana, pichoq, kitob uchun taglik va boshqalar haqida mahalliy fuqarolardan olingan qiziqarli ma’lumotlar berib o‘tildi.
Bundan tashqari, samarqandcha osh tayyorlash jarayoni batafsil yoritib berildi. Milliy shirinlik va quruq mevalar ham alohida tilga olindi.
Anton do‘ppi, to‘n, Buxoro pichog‘i, quruq mevalar, konservalangan osh va Nasriddin Afandining rasmini sotib oldi va bularning barchasiga bor-yo‘g‘i 98 dollar sarfladi.
Mariya esa chambarak (obodok)ka o‘rnatilgan mitti do‘ppi, so‘zana, atlas ko‘ylak, kitob uchun taglik hamda teletomoshabin uchun sovg‘aga jami 1145 dollar xarjladi.
Ta’kidlash joiz, “Oryol i reshka. Shoping”ning Facebook tarmog‘idagi sahifasida teletomoshabinlar narxi 100 dollardan oshmaydigan sovg‘a so‘rashi mumkin. Eng noyob sovg‘alar teletomoshabinga jo‘natiladi. Ushbu ko‘rsatuvda esa foydalanuvchilardan birining iltimosi tanlab olindi va u so‘ragan moviy lagan xarid qilindi.
Ko‘rsatuv so‘ngida har ikkala boshlovchi ham o‘z xaridlaridan ko‘ngli to‘lganini ta’kidlab, O‘zbekistonda kiyim-kechak va buyumlar arzon ekanligini aytib o‘tdi. Mahsulotlarga ko‘p mehnat sarflanishiga qaramay, ularga yuqori narx qo‘yilmasligini aytishdi.
Eslatib o‘tamiz, Ukrainaning “Oryol va reshka. Shoping” teleko‘rsatuvi may oyi oxirida Samarqand, Toshkent va Buxoroda suratga olingan edi.
Izoh (0)