Xitoyning Ulanchab shahrida boks bo‘yicha xotin-qizlar o‘rtasida o‘tkazilgan Osiyo chempionati nihoyasiga yetdi, deb xabar beradi O‘zbekiston Milliy olimpiya qo‘mitasi matbuot xizmati.
Qit’aning yetakchi charm qo‘lqop ustalari ishtirokida bo‘lib o‘tgan mazkur musobaqada O‘zbekiston terma jamoasi a’zolari 2 ta kumush va 2 ta bronza medaliga sazovor bo‘ldi.
O‘zbekiston terma jamoasi hisobiga kumush medallarni Shahnoza Nizomova (-69 kg) va Go‘zal Ismatova (+81 kg) keltirgan bo‘lsa, Yodgoroy Mirzayeva (-57 kg) hamda Dilnavoz Norxo‘jayeva (-81 kg) bronza medallariga sazovor bo‘ldi.
Shu o‘rinda ta’kidlash joizki, O‘zbekiston ayollar boksi tarixida shu kunga qadar hech bir sportchi Osiyo chempionatida sovrinli o‘rinni qo‘lga kiritmagan edi. Rahmatjon Ro‘zioxunov boshchiligida Сhin mamlakatiga yo‘l olgan terma jamoa a’zolarining bir yo‘la to‘rt nafarining sovrindorlar safidan o‘rin egallashi chindanda tahsinga loyiq.
Terma jamoa a’zolari 16-avgust kuni Toshkent vaqti bilan soat 23:30 da O‘zbekistonga qaytib keladi.
Izoh (0)