O‘z vazn (87 kilogrammgacha) toifasida jahonning birinchi raqamli taekvondochisi bo‘lib turgan o‘zbekistonlik Jasur Boyqo‘ziyev 22-iyul kuni Janubiy Koreyada boshlangan Korea Open musobaqasida g‘oliblik shohsupasiga ko‘tarildi. Bu haqda “Olamsport.com” xabar bermoqda.
Bundan tashqari, o‘zbekistonlik taekvondochi Rio-2016 Olimpiadasining muhim 20 reyting ochkosiga ham ega bo‘ldi. Shunday qilib, Boyqo‘ziyevning umumiy reyting ochkolari 340 taga yetdi.
Ma’lumot uchun, taekvondoning olimpiya o‘yinlari oilasiga mansub WTF yo‘nalishidagi eng nufuzli hisoblangan mazkur musobaqada O‘zbekiston terma jamoasining to‘liq tarkibi ishtirok etyapti.
22-iyul kuni bo‘lib o‘tgan bahslarda esa o‘zbekistonliklardan 54 kilogrammgacha bo‘lgan vaznda Sarvarbek Sheraliyev hamda qizlar terma jamoasi a’zolari Malika Komilova va Ra’no Boybo‘tayeva mag‘lubiyatga uchradi.
23-iyul kuni jahon chempioni, o‘zbekistonlik Dmitriy Shokin 87 kilogrammdan og‘ir vazn toifasida dayanga chiqadi. Shuningdek, aka-uka Nikita va Maksim Rafalovich, Sultonbek Chorshaboyev, Abror Nuriddinov, Vladislav Xan, Umida Abdullayeva, Go‘zal Norboboyeva kabi o‘zbekistonlik yetakchi sportchilar ham o‘z imkoniyatlarini sinovdan o‘tkazadi.
Izoh (0)