O‘zbekiston Respublikasi Prezidenti Islom Karimov Ufa shahrida bo‘lib o‘tadigan Shanxay hamkorlik tashkiloti sammiti “maydonlarida” 10-iyul kuni Rossiya Prezidenti Vladimir Putin bilan ikki tomonlama uchrashuv o‘tkazadi, deb xabar bermoqda UzDaily.
Rossiya Prezidenti yordamchisi Yuriy Ushakovning so‘zlariga ko‘ra, Kreml Rossiya va O‘zbekistonning energetika sohasidagi hamkorligi kengayishiga umid bildirmoqda. Bu masala ikkala mamlakat rahbarlari uchrashuvida muhokama qilinadi.
Shuningdek, Prezidentlar ta’lim sohasidagi aloqalarni mustahkamlash masalasiga e’tibor qaratishi, savdo-iqtisodiy va madaniy-gumanitar sohalarda ikki tomonlama ittifoqchilik va strategik sherikchilikni yanada rivojlantirish masalalarining keng doirasini muhokama qilishi rejalashtirilgan. Global va mintaqaviy kun tartibining dolzarb masalalari yuzasidan fikr almashish ko‘zda tutilgan.
Eslatib o‘tamiz, 8—10-iyul kunlari Rossiyaning Ufa shahrida Shanxay hamkorlik tashkiloti hamda BRIKS sammitlari bo‘lib o‘tadi.