O‘zbekiston terma jamoasi bosh murabbiyi Mirjalol Qosimov KXDR (2:4) bilan bo‘lib o‘tgan uchrashuv haqidagi fikrlari bilan o‘rtoqlashdi, deb xabar bermoqda “Olamsport”.
“Uchrashuv boshlanishi bilan tezkor gol o‘tkazib yubordik. Uchta golni ham KXDR standart vaziyatlardan urdi. Ikkita burchak zarbasi va bitta autdan so‘ng gol qo‘yib yubordik. Bunday voqealar rivojini hech kim kutmagan edi. Tezkor gollar barcha rejalarimizni buzib yubordi. Sun’iy qoplamali maydonda o‘ynadik. Umuman bunday maydonda o‘ynashimiz oldindan ma’lum edi. To‘rtinchi golni esa qarshi hujumda urishdi. Hujumga o‘tib ketganimizda ular tezkor qarshi hujum orqali darvozamizni ishg‘ol etishdi. Ikkinchi bo‘limda hujum qildik, vaziyatlar yaratdik. Biroq hisobdagi farqni butunlay yo‘qqa chiqara olmadik. Futbolchilar tanaffusdan keyin ham qo‘l siltashmadi, harakat qilishdi. Lekin vaziyatni o‘zgartirish qiyin edi. Hisob yiriklashib ketganidan keyin to‘xtab qolmadik va imkon qadar futbolchilar ham o‘ynashdi va ikkita gol kiritishga erishishdi. Bunaqangi o‘yinlarda bu kabi oddiy xatolarga yo‘l qo‘yish kerak emas. Barcha gollarni o‘zimizning xatolarimiz evaziga o‘tkazib yubordik. Achinarlisi, juda oddiy vaziyatlarda qo‘pol xatolarga yo‘l qo‘ydik. Bu o‘yinda yutqazishimiz kerak emasdi. Biroq futbolchilar sun’iy qoplamali maydonda o‘zlari istagandek harakat qila olishmadi. O‘yindan bir kun oldin mashg‘ulot o‘tkazgandik, lekin futbolchilar bunaqa maydonda tezda moslashib keta olishmaydi”, — deya o‘yin haqidagi fikrlarini bildirdi Mirjalol Qosimov.
— Bu uchrashuvda qaysi futbolchilarning o‘yinidan ko‘nglingiz to‘lmadi? Legionerlar terma jamoada o‘z imkoniyati darajasida o‘ynay olishmayapti. Nesterov ham o‘tkazib yuborilgan gollarda xatoga yo‘l qo‘ygan ekan...
— Barcha futbolchilar harakat qilishdi. Bu o‘yindagi mag‘lubiyatda kimnidir ayblamoqchi emasman. Hayot shunday. O‘yindan so‘ng uni emas, buni qo‘yish kerak edi, degan fikrlar bo‘ladi. Ignatiy Nesterovni tajribasiga suyangan holda uni asosiy tarkibga kiritgandim. Shu yerda xato qildim. Eldor Suyunovni asosiy tarkibga kiritishim kerak edi. Bu bilan Nesterovni ayblamoqchi emasman. Lekin darvozaga turgandan keyin ishonchni ham oqlash kerak. Ba’zi vaziyatlarda jamoamizni Nesterov goldan qutqarishi lozim edi. Nesterovni tajribasiga ishonib, futbolchilarga dalda bo‘ladi degan ma’noda unga ishonch bildirgandim. Bu qaror o‘zini oqlamadi.
— Bu mag‘lubiyat faoliyatingizga qanday ta’sir qiladi?
— Ertaga nima bo‘lishini Xudo biladi. Nima bo‘lsa o‘shanda ko‘ramiz. Bugun nima qilib bo‘lsa ham g‘alaba qozonishimiz shart edi. Oddiy vaziyatlardagi xatolar, bir o‘yinda keragidan ortiq xatolarga yo‘l qo‘ydik. Sun’iy qoplamali maydon ham baribir ta’sir ko‘rsatdi. Odil Ahmedovda imkoniyat bo‘ldi, Tursunov, Nasimov gol urishi mumkin edi. Biroq vaziyatlardan unumli foydalana olmadik.
— O‘zbekiston terma jamoasi guruhdan chiqa oladimi?
— Albatta chiqa olamiz. Bunga shubha yo‘q. Filippin g‘alaba qozonganidan xabardormiz. Aytganimdek, Filippin tarkibida yaxshi futbolchilar jamlanishgan. Ularga oddiy raqibdek qaramaslik lozim. O‘zbekiston terma jamoasi bu guruhdan chiqadi.
Izoh (0)