Zimbabve Respublikasi o‘z milliy valyutasidan uzil-kesil voz kechib, AQSh dollariga o‘tdi, deb xabar bermoqda “Segodnya.ua”. 15-iyundan boshlab mahalliy pullarni almashtirish mumkin bo‘ladi.
Avval xabar berilganidek, Zimbabvedagi bank omonatchilari, agar ularning omonatlari miqdori mahalliy dollarda 175 kvadrillionni tashkil etsa, 5 AQSH dollari miqdorida pul oladi. Agar omonat miqdori 175 kvadrillion dollardan oshsa, u holda 1 AQSH dollari uchun 35 kvadrillion Zimbabve dollaridan hisoblab, pul chiqarib beriladi.
Banknotalar o‘zining fantastik qiymati tufayli esdalik sifatida katta talabga ega. Har 250 trillion Zimbabve dollariga 1 AQSh dollari to‘lanmoqda. Valyuta almashtirish sentabr oyida yakunlanishi kutilmoqda.
Zimbabve Respublikasi 2008-yilda giperinflyatsiya bo‘yicha jahon rekordini o‘rnatgan bo‘lib, u rasman 231 million foizga baholangan. Eng yirik banknota 2008-yilda chiqarilgan 100 trillion Zimbabve dollari hisoblanadi — bu bir hafta avtobusda yurish uchun yetmaydi.
Izoh (0)