Toshkent shahrida 2015-yil 16-may kuni O‘zbekiston Respublikasi Oliy Majlisi Senatining ikkinchi yalpi majlisi o‘z ishini davom ettirdi, deya xabar bermoqda O‘zA.
Yalpi majlisning ikkinchi kunini senatorlar konstitutsiyaviy vakolatlariga muvofiq O‘zbekiston Respublikasi Hisob palatasining 2014-yildagi faoliyati to‘g‘risidagi hisobotni ko‘rib chiqishdan boshladi.
Hisobot yilida Hisob palatasi tomonidan byudjet mablag‘laridan foydalanishga doir 33 ta yo‘nalish bo‘yicha 149 ta obyektda nazorat tadbirlari o‘tkazildi.
Hisobot yilida qilingan ishlar natijasida davlatning yoki xo‘jalik yurituvchi subyektlarning manfaatlariga yetkazilgan 81,5 milliard so‘mlik zararning o‘rni qoplanishiga erishildi.
Oliy Majlis Senatining O‘zbekiston Respublikasi Tabiatni muhofaza qilish davlat qo‘mitasining 2013-yildagi faoliyati to‘g‘risidagi hisoboti yakunlariga doir qarorini bajarish maqsadida qabul qilingan tadbirlar dasturiga muvofiq ushbu dasturning 11 ta asosiy yo‘nalishi bo‘yicha 33 ta tadbir bajarildi.
Tabiatni muhofaza qilish davlat qo‘mitasi tashabbusiga ko‘ra 2014-yilda Hukumatning atrof-muhitni muhofaza qilish, tabiiy resurslardan oqilona foydalanish va ularni tiklash sohasidagi 10 ta qarori qabul qilindi. Ushbu qarorlar manfaatdor vazirlik va idoralar bilan hamkorlikda nodavlat notijorat tashkilotlari hamda jamoatchilikning faol ishtirokida ishlab chiqildi.
2013—2017-yillarda atrof-muhit muhofazasi bo‘yicha harakatlar dasturini, shuningdek, uning asosida qabul qilingan hududiy dasturlarni ro‘yobga chiqarishga alohida e’tibor qaratildi. Hisobot yili mobaynida 951 ta xo‘jalik yurituvchi subyekt tekshirildi, 15 mingdan ortiq tezkor nazorat tadbiri o‘tkazildi. Sanoat korxonalarida tabiatni muhofaza qilishga doir tadbirlar o‘tkazilishi natijasida atmosfera havosiga ifloslantiruvchi moddalar chiqarilishi 7,0 tonnaga kamaydi.
Majlisda O‘zbekiston Respublikasi Oliy Majlisi Senatining vakolatiga kiradigan boshqa masalalar ham ko‘rib chiqildi.
Izoh (0)