Bokudagi 16 qavatli turar-joy binosida ro‘y bergan katta yong‘in natijasida 16 kishi halok bo‘ldi. Bu haqda, Ozarbayjon Sog‘liqni saqlash vazirligi matbuot xizmatiga asoslanib, “Interfaks-Ozarbayjon” xabar bermoqda.
Vazirlikdan ma’lum qilishlaricha, jabrlanuvchilarning 54 nafari kasalxonaga olib kelingan, o‘n nafar jabrlanuvchiga hodisa joyining o‘zida tibbiy yordam ko‘rsatilgan.
Ozarbayjon bosh prokurori Zokir Garalovning so‘zlariga ko‘ra, yong‘in, dastlabki taxminlarga ko‘ra, bino devorini qoplash ishlari sifatsiz amalga oshirilgani sabab yuz bergan. Yong‘in sabablarini aniqlash maqsadida qutqaruv va huquqni muhofaza qilish organlari tomonidan qo‘shma tekshiruv guruhi tashkil etilgan.
1news.az’ning xabar berishicha, 19-may, seshanba kuni tongda Azadlig shohko‘chasidagi binoda boshlangan yong‘inni o‘chirish ishlariga Ka-32 vertolyoti jalb etilgan, u yuqori qavatlardagi olovni o‘chirishga urinmoqda.
Ta’kidlashlaricha, halok bo‘lganlarning uch nafari – yosh bolalardir. Ular tutundan dimiqib halok bo‘lgani aytilmoqda.
Izoh (0)