Toshkent shahrida 2015-yil 15-may kuni O‘zbekiston Respublikasi Oliy Majlisi Senatining ikkinchi yalpi majlisi ochildi, deya xabar bermoqda O‘zA. Unda Vazirlar Mahkamasining taklif etilgan a’zolari, vazirlik va idoralarning rahbarlari, boshqa tashkilotlarning, ommaviy axborot vositalarining vakillari ishtirok etdi.
O‘zbekiston Respublikasi Oliy Majlisi Senati yalpi majlisining birinchi kunida senatorlar tomonidan 10 ta masala ko‘rib chiqildi. Ularning 7 tasi sotsial-iqtisodiy, ijtimoiy-siyosiy islohotlarni yanada chuqurlashtirish, investitsiya va ishchanlik muhitini yaxshilash, xususiy tadbirkorlikni rivojlantirish, sud-huquq sohasini takomillashtirish, fuqarolar sog‘lig‘i asralishini, axborot xavfsizligini ta’minlashga qaratilgan qonunlardir.
Senatorlar ishni “Tashuvchining fuqarolik javobgarligini majburiy sug‘urta qilish to‘g‘risida”gi O‘zbekiston Respublikasi qonunini ko‘rib chiqishdan boshladilar.
Senatorlarning fikricha, ushbu qonunning qabul qilinishi sug‘urta bozori va transport infratuzilmasini rivojlantirishga, ko‘rsatilayotgan xizmatlar sifatini oshirishga, fuqarolarning huquqlari va qonuniy manfaatlarini himoya qilishga, yangi ish o‘rinlarini yaratishga ko‘maklashadi. Qonun senatorlar tomonidan ma’qullandi.
Shundan so‘ng senatorlar qonunchilik tashabbusi tartibida O‘zbekiston Respublikasi Vazirlar Mahkamasi tomonidan kiritilgan yangi tahrirdagi “Qimmatli qog‘ozlar bozori to‘g‘risida”gi O‘zbekiston Respublikasi qonunini ko‘rib chiqdilar.
Senatorlar ta’kidlaganlaridek, ushbu qonunning qabul qilinishi qimmatli qog‘ozlar bozoridagi investitsiya muhiti va ishchanlik muhitini, fond bozoridagi xizmatlar sifatini yaxshilashga, mulkdorlar sinfi o‘sishiga va aholi uchun daromadlar manbalarini ko‘paytirishga, shuningdek, investitsiyaviy loyihalarni moliyalashtirish uchun kapital, shu jumladan, chet el investitsiyalari oqib kelishiga ko‘maklashadi. Qonun senatorlar tomonidan ma’qullandi.
Shundan so‘ng senatorlar yangi tahrirdagi “Elektron tijorat to‘g‘risida”gi O‘zbekiston Respublikasi qonunini ko‘rib chiqdilar.
Senatorlarning fikricha, ushbu qonunning qabul qilinishi tadbirkorlikni rivojlantirish va ishchanlik muhitini yaxshilash uchun qo‘shimcha shart-sharoitlar yaratilishini, elektron tijoratning yanada takomillashtirilishini ta’minlash imkonini beradi. Qonun senatorlar tomonidan ma’qullandi.
Senatorlar “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish, shuningdek ayrim qonun hujjatlarini o‘z kuchini yo‘qotgan deb topish to‘g‘risida”gi O‘zbekiston Respublikasi qonunini ko‘rib chiqdilar va ma’qulladilar. Mazkur qonunning asosiy maqsadi sotsial-iqtisodiy, ijtimoiy-siyosiy va sud-huquq sohalariga oid amaldagi qonun hujjatlarini yanada takomillashtirishdan iborat.
Shundan so‘ng senatorlar O‘zbekiston Respublikasi bilan Birlashgan Arab Amirliklari o‘rtasidagi ikki tomonlama hamkorlikni yanada kengaytirishga qaratilgan bir qator xalqaro shartnomalarni ratifikatsiya qilish to‘g‘risidagi qonunlarni ko‘rib chiqdilar va ma’qulladilar.
Izoh (0)