Sudanda mahalliy vaqt bilan 8:00da saylov uchastkalari ochilib, prezident va parlament saylovi boshlandi. “RIA Novosti” xabariga ko‘ra, saylov uch kun davom etadi.
Ma’lumot uchun, 2011-yili mamlakat tarkibidan Janubiy Sudan ajralib chiqib, o‘z mustaqilligini e’lon qilganidan beri Sudanda o‘tkazilayotgan ilk saylovlardir.
Mamlakatdagi eng oliy lavozim uchun asosiy da’vogar – mamlakatning ko‘p yillik prezidenti, general-leytenant Umar al-Bashirdir. U 1989-yilda amalga oshirilgan harbiy to‘ntarishdan beri Sudanni boshqarib kelmoqda. Joriy saylovda 14 nomzod unga raqiblik qiladi.
Muxolifat yetakchilari ushbu saylovlarga nisbatan boykot e’lon qilishgan. Shuningdek, mamlakatning yetakchi partiyalari ham birorta nomzodni ro‘yxatdan o‘tkazishgani yo‘q. Muxolifat vakillarining ta’kidlashicha, saylovdan avval o‘tish davri hukumati shakllantirilishi va konstitutsiyaga o‘zgartirishlar kiritilishi kerak edi. Busiz, muxolifatning fikricha, saylovlar safsatabozlikdan boshqa narsa emas.
G‘arb mamlakatlari va tashkilotlari Sudandagi ushbu saylovlarga o‘z kuzatuvchilarini yo‘llashdan bosh tortishdi, Yevropa Ittifoqi esa maxsus bayonot berib, “joriy saylovlar natijalari ishonchli emasligi va butun mamlakat bo‘ylab qonuniy kuchga ega bo‘lmasligi”ni ta’kidladi.
Saylovni arab mamlakatlari vakillari, Sudanda iqtisodiy manfaatlari bor Xitoy, shuningdek, boshqa bir qator mamlakatlar, xususan, Rossiya kuzatib boradi.
Saylovlar hukumat armiyasining Darfur va Janubiy Kordofandagi isyonchilarga qarshi kurashi to‘xtamayotgan, neftga boy Janubiy Sudanning mustaqilligidan so‘ng yuzaga kelgan iqtisodiy inqiroz hamon davom etayotgan bir davrda bo‘lib o‘tmoqda.
Sudan Markaziy saylov komissiyasi ma’lumotlariga ko‘ra, mamlakat hududida istiqomat qiluvchi 38 milliondan ortiq aholining 13 millionida ushbu saylovda ishtirok etish huquqi bor.
Izoh (0)