Siyosatchi Boris Nemsovning o‘ldirib ketilishi bo‘yicha ishning asosiy figuranti Zaur Dadayev o‘zining dastlabki iqror bo‘luvchi ko‘rsatmalarida unga jinoyatni tashkillashtirishda “Rusik” laqabli Checheniston fuqarosi yordam berganini aytgan edi, deb yozadi “RBK”.
007 raqamli Mercedes ML avtomobili bo‘lgan “Rusik” unga patronli PM to‘pponchasini va ZAZ Chance avtomobilini keltirib bergan. Qotillikdan bir necha soat o‘tib, to‘pponchani “Rusik”ning odami olib ketgan, “Rusik”ning o‘zi esa jinoyatdan bir kun o‘tib, Dadayevni aeroportga olib borgan, u u yerdan Grozniyga uchib ketgan. Ta’kidlash joiz, bu Dadayevning dastlabki ko‘rsatmalari bo‘lib, bir hafta avval u bularni rad etdi.
Avvalroq ishning yana bir figuranti Temirlan Eskerxanov Dadayevning “Sever” batalyoni bo‘yicha sobiq safdoshi Ruslan Geremeyevning 007 raqamli Mercedes ML avtomobili borligini aytgan edi. Dadayevning o‘zi esa “Rusik” bilan savdo markazida tasodifan tanishib qolganligini ta’kidlagan. Dadayev qotillikni g‘arazli maqsadda amalga oshirganligini rad etdi va “Rusik” jinoyatga tayyorgarlik chog‘ida ularga 5 million rubl va’da qilganligini aytdi.
“Novaya gazeta” ma’lumotlariga ko‘ra, Ruslan Geremeyev Davlat dumasi deputati Adam Delimxanov va Chechenistondan senator Sulaymon Gremeyevning jiyanidir. Ayni paytda u Grozniyda Checheniston kuchlari qat’iy nazorati ostida saqlanmoqda.
Izoh (0)