Rossiyalik milliarderlar qanday samolyotlarda parvoz qiladi (fotogalereya)

Dunyoning eng boy insonlari ro‘yxatidan o‘rin olgan rossiyalik milliarderlar ish va boshqa masalalar yuzasidan sayohatga chiqqanda turli uchish vositalaridan foydalanadi. Forbes jurnali ularning shaxsiy uchoqlaridan iborat fotogalereyani taqdim etdi.

Roman Abramovich: Boeing 767-300ER

Abramovichning samolyoti aks etgan fotosuratlar dunyoning turli chekkalarida, Nitssa, Sen-Marten, Zalsburg, Tel-Avivda tushirilgan. Aruba orolida ro‘yxatdan o‘tkazilgan samolyot 11 ming kilometr masofaga to‘xtovsiz ucha oladi.

Mixail Fridman: Mi-171

“Alfa-grupp” rahbari o‘ziga xos harakatlanish vositasini tanlagan. Narxi 10 million dollar turadigan vertolyot 600−800 kilometrga to‘xtovsiz ucha oladi.

Vladimir Yevtushenkov: Boeing 737-7FY

“Sistema” rahbari Boeing 737-7FY laynerining VIP-versiyasidan foydalanib keladi.

Mixail Proxorov: Airbus A319

“Oneksim” guruhi rahbariga xizmat ko‘rsatadigan Airbus samolyoti Global Jet Luxembourg kompaniyasida ro‘yxatga olingan va 88,6 million dollar turadi.

Dmitriy Ribolovlev: Airbus A319-133

Ribolovlev ushbu samolyotni bir paytlar o‘ziga tegishli bo‘lgan “Uralkaliy”dan sotib olgan.

Rustam Tariko: Boeing 737-7BC

“Russkiy standart” banki rahbarining Bermud orollarida ro‘yxatdan o‘tkazilgan samolyoti o‘ziga xos tarzda bezatilgan.

Gennadiy Timchenko: Gulfstream G650

“Novatek” direktorlar kengashi a’zosiga tegishli bo‘lgan samolyot to‘xtovsiz 12 964 kilometrgacha ucha oladi.

Oleg Tinkov: Dassault Falcon 900LX

“Tinkoff kreditniye sistemi” banki rahbarining samolyoti esa 8890 kilometrga to‘xtovsiz parvoz qila oladi.

Alisher Usmonov: Airbus A340-300

13700 kilometrga to‘xtovsiz uchadigan Bourkhan nomli samolyotning ro‘yxatdan o‘tkazilgan kodi M-IABU bo‘lib, “Men, Alisher Burxonovich Usmonov” (I, Alischer Burkhanovich Usmanov) ko‘rinishida ta’riflanadi.

Sulaymon Karimov : Boeing 737-800

Karimov shu paytgacha bir nechta samolyotlardan foydalangan, hozirda esa unga Boeing 737-800 xizmat ko‘rsatmoqda.