Mozilla Firefox brauzerining 36-versiyasi o‘zbek tilida chiqarildi. Bu haqda dasturni uch yil davomida tarjima qilgan Akmal Xushvaqtov o‘z blogida ma’lum qildi, deb xabar beradi “Kun.uz”.
36-versiyaning o‘zbek tilida chiqarilgani haqida Mozilla saytida ham axborot berilgan, xususan, unda Firefox’ning yangi versiyasida, HTTP/2 protokolida ishlay olish va “yopishtirilgan” tablarni sinxronizatsiya qilish xossalaridan tashqari o‘zbek tili ham qo‘shilgani qayd etilgan.
“Nazarimda tarjimalar juda yomon chiqmagan, <...> [ba’zi] xato ketgan joyi bor, <...> yangi so‘zlar qo‘shilgan va ular hali o‘zbek tiliga o‘girilmagan. Aniqrog‘i, men xabarsiz qolibman. Keyingi versiyalarda o‘zbek tilida ko‘rasiz”, – deb yozadi tarjimon.
“Qisqasi, o‘zbekcha Mozilla Firefox kerak deb o‘ylayman. Shunchaki, faqat internetni ko‘rish emas, undan foydalanishni oson qilish uchun ham o‘zbek tili bo‘lgani yaxshi, deb o‘ylayman”, – deya qo‘shimcha qiladi Akmal Xushvaqtov.
Mozilla Firefox brauzerining 36-versiyasini bu yerda ko‘chirib olish mumkin.
Izoh (0)