2015-yil 17-yanvardan Toshkentda ilk ikki qavatli ekskursiya avtobuslari qatnay boshladi, deya xabar bermoqda UzDaily. Aznur Travel sayyohlik kompaniyasi turlar tashkilotchisi hisoblanadi.
Nashrning eslatishicha, Aznur Travel kompaniyasi dunyoda eng yirik avtobus ishlab chiqaruvchilardan biri — Xitoyning Higer kompaniyasidan ikkita dabldeker sotib olgan edi.
Tashkent city tour yozuvi va O‘zbekistonning sayyohlik logotipi tushirilgan ikkita avtobus shahar bo‘ylab har kuni qatnaydi. Avtobuslar “O‘zbekiston” mehmonxonasidan 9:00, 10:00, 12:00, 13:00, 15:00 va 16:00 da yo‘lga chiqadi.
Sayyohlik kompaniyasi ma’lumotlariga ko‘ra, ekskursiya 2,5 soat davom etadi. Sayohat chog‘ida turistlar Toshkentdagi diqqatga sazovor joylar va tarixiy yodgorliklarga tashrif buyuradi.
Chiptalar narxi 7—16 yoshdagi bolalar uchun 15 ming so‘m, kattalar uchun 25 ming so‘m va xorij fuqarolari uchun Markaziy bank kursi bo‘yicha 20 dollarni tashkil etadi.
Chiptalarni Aznur Travel kompaniyasining “O‘zbekiston” mehmonxonasi binosida joylashgan ofisida, shuningdek yo‘nalish bo‘ylab joylashgan maxsus bekatlarda xarid qilish mumkin.
Chiptalar 24 soat davomida amal qiladi, yo‘lovchilar qaysidir bekatda uzoqroq ushlanib qolishi va kun oxirigacha yo‘lni keyingi reyslarda davom ettirishi mumkin.
Avtobuslar maxsus audiotizim bilan jihozlangan. Sayyohlar audioturni sakkizta — ingliz, nemis, rus, o‘zbek, fransuz, ispan, yapon va xitoy tillarida tinglashi mumkin. Avtobuslar shuningdek imkoniyati cheklangan kishilar uchun maxsus panduslarga ega.
Nashrning ta’kidlashicha, Aznur Travel kompaniyasi bunday dabldekerlar umumiy sonini 15 tagacha yetkazib, Samarqand va Buxoroda ham qo‘shimcha ekskursiya yo‘nalishlarini ochmoqchi. Navbatdagi ikkita avtobus mart—aprel oylarida yetkaziladi.
Izoh (0)