AQShning Ogayo shtati Klivlend shahrida sud umrining 39 yilini qamoqda o‘tkazgan 57 yoshli afro-amerikalik Riki Jeksonga qo‘yilgan barcha ayblovlarni bekor qildi. Huquqni muhofaza qiluvchi “Aybsizlik” loyihasi ma’lumotlariga ko‘ra, bu shunga o‘xshash voqealarda erishilgan o‘ziga xos rekorddir. Bu haqda Reuters agentligi xabar bermoqda.
Jekson ikki kishi bilan birgalikda 1975-yilda Klivlenddagi do‘konlardan birida pul o‘tkazmalari bilan shug‘ullanuvchi Xarold Frenksga nisbatan amalga oshirilgan qotillikda ayblangan edi. Mazkur ish ko‘rib chiqilayotganda 12 yoshli Eddi Vernonning Xarold Frenksga hujum qilingan vaqtni ko‘rganini aytib, bergan ko‘rsatmasi yagona dalil sifatida foydalanilgan edi.
Hozirda 53 yoshda bo‘lgan Vernonning o‘z ko‘rsatmalarini rad etishi va hukumatga hech qachon jinoyat guvohi bo‘lmaganini ma’lum qilishi ishni qayta ko‘rib chiqish uchun asos bo‘ldi.
Vernonning ruhoniyga qotillik sodir etilgan vaqtda aslida maktab avtobusida bo‘lganini tan olgani va buni boshqa guvohlar ham tasdiqlaganidan so‘ng, Ogayo shtati bo‘yicha “Aybsizlik” loyihasi advokatlari sudga ishni qayta ko‘rib chiqish bo‘yicha iltimosnoma bilan murojaat qildi. Huquqni muhofaza qiluvchi tashkilotning qayd etishicha, Vernon hukumatga yoqish uchun politsiyaga ham, prokuror va sudga ham yolg‘on gapirganini aytgan.
Natijada Jekson okrug sudi tomonidan aybsiz deb topildi. U bilan sudlangan qolgan ikki aka-uka Brijmen ham ishni qayta ko‘rib chiqish bo‘yicha iltimosnoma topshirdi, biroq hozircha ularning ishi bo‘yicha qaror qabul qilinmadi.
Jekson avvaliga o‘lim jazosiga mahkum etilgan edi. Biroq mazkur hukm hujjatlarni rasmiylashtirishda yuzaga kelgan xatolik tufayli bekor qilingan edi. Aka-uka Brijmen esa 1978-yil Ogayo shtatida o‘lim jazosi konstitutsiyaga zid deb topilguniga qadar o‘limga hukm qilinganlar kamerasida saqlangan.
Izoh (0)