Germaniyadagi ot poygalari tashkilotchilari Checheniston rahbari Ramzan Qodirovga tegishli tulporlarning g‘alabasi uchun mukofot pulini to‘lashdan bosh tortmoqda. Zazu va Tezkor Finish laqabli otlarning sovrinlari ularning sohibiga Yevropa Ittifoqi tomonidan moliyaviy sanksiyalar qo‘yilgani tufayli berilmagan, deb xabar bermoqda Korrespondent.net.
The Washington Post’ning xabar berishicha, Zazu ot poygalarida ancha mashhur bo‘lib, butun dunyo bo‘ylab poygalarda 1 million yevrodan ortiq pul yutib olgan. Kyolnda shug‘ullantirilgan otning Baden-Badenda yutib olgan 5000 yevro va Dyusseldorfdagi poyga uchun 2000 yevro miqdoridagi mukofot pullarini to‘lashdan tashkilotchilar bosh tortgan.
Endi Qodirovning otlariga poygalarda qatnashish ham taqiqlab qoyilgan. Ularga ketadigan xarajatlarni o‘z hamyonidan qoplashiga to‘g‘ri kelgan murabbiy Voldemar Xikst hayvonlarga jonsiz buyum kabi munosobatda bo‘linganidan noroziligini bildirgan. Otlarning xo‘jayini Ramzan Qodirov bu masalada fikr bildirmagan.
Norasmiy manbalarga ko‘ra, Checheniston prezidentining 100 ga yaqin poyga otlari mavjud. 2013-yilda ular ketma-ket Dubayda 200 ming dollar va Singapurda 3 million dollar miqdoridagi mukofot pullarini yutib olgan. Mutaxassislar Qodirov otlarining ehtiyojlari uchun yiliga 24 million rubl sarflashini taxmin qilgan.
Izoh (0)