NATO Sharqiy Yevropaga beshta baza joylashtirmoqchi. “ITAR-TASS”ning Frankfurter Allgemeine Sonntagszeitung gazetasiga tayanib xabar berishicha, ular Latviya, Litva, Estoniya, Ruminiya va Polsha hududlarida paydo bo‘ladi.
Shimoliy Atlantika alyansi rejalari bo‘yicha, bazalarning har biriga uzoq muddatli asosda 600 nafargacha harbiy xizmatchi ko‘chirib o‘tkaziladi. Nashr boshqa muhim tafsilotlarni keltirmaydi, ushbu rejalar 4—5-sentabr kunlari Uelsda bo‘lib o‘tadigan sammitda batafsil muhokama etiladi.
Avvalroq NATO bosh kotibi Anders Fog Rasmussen ushbu gazetaga bergan intervyusida Alyans Sharqiy Yevropadagi ishtirokining “yanada ko‘rinarliroq” bo‘lishiga erishishi maqsadga muvofiq bo‘lishini aytgan edi. Uning so‘zlariga ko‘ra, Uelsda tezkorlik bilan javob qilish kuchlari samaradorligini oshirish haqida qaror qabul qilinadi, bu NATOga yangi paydo bo‘layotgan xavflarga tezkorlik bilan javob qilish imkonini beradi.
Rasmussen ushbu kuchlarni “nayza uchi” deb atadi va bu niyatlarni amalga oshirish uchun blokka a’zo mamlakatlarda zarur infratuzilmani shakllantirish kerak bo‘lishini aytdi.
“Bizning Sharqdagi ittifoqdoshlarimiz bu rejadan qoniqadi, deb o‘ylayman”, — dedi u.
“Shimoliy Atlantika alyansining har bir a’zosini samarali mudofaa qilish uchun zarur bo‘lgan barcha choralarni ko‘ramiz”, — ta’kidladi bosh kotib.
Izoh (0)