Putin Rossiyaga sanksiya e’lon qilgan mamlakatlardan oziq-ovqat import qilishni taqiqladi

Rossiya prezidenti Vladimir Putin Rossiyaga qarshi iqtisodiy sanksiyalar joriy etgan mamlakatlardan qishloq xo‘jaligi mahsulotlari, xomashyo va oziq-ovqat import qilishni taqiqlash to‘g‘risidagi farmonni imzoladi. Bu haqda Kreml matbuot xizmatiga tayanib, “Kun” xabar berdi.

Xabar berishlaricha, ushbu taqiq kuchga kirgan kunidan boshlab bir yil amalda bo‘ladi. Putin taqiq ostiga tushadigan mahsulotlar ro‘yxatini tuzib chiqish haqida ko‘rsatma bergan.

Slon.ru’ning xabar berishicha, AQSh, Kanada, Yevropa Ittifoqi mamlakatlari, Shveysariya va Yaponiya Rossiyaga nisbatan turli sanksiyalar joriy etgan.

Qayd etishlaricha, Rossiya hukumati ushbu mamlakatlardan qishloq xo‘jaligi va oziq-ovqat mahsulotlari importi cheklanishi munosabati bilan, Rossiyaning o‘zida ushbu mahsulotlar qimmatlashuvini oldini olish bo‘yicha choralar ishlab chiqishga kirishgan.

Avvalroq, Rossiyaning nazorat qiluvchi organlari Ruminiyadan yirik shoxli chorva, Gretsiya va Italiyadan jonivorlar, Polshadan meva va sabzavotlar hamda Ukrainadan turli mahsulotlar importini taqiqlab qo‘ygandi.

Ayni vaqtda, “Vedomosti” gazetasining xabar berishicha, Putin tomonidan imzolangan “sanksiyalarga javob” farmonida bir qator istisnolar ham bor. Xususan import taqiqi vino va bolalar oziq-ovqat mahsulotlariga tatbiq etilmaydi.