Filippindagi “Rammasun” to‘foni qurbonlarining soni 54 ga yetdi. Shuningdek, arxipelagning 100 nafar aholisi jabrlangani, uch kishi esa izsiz yo‘qolgani ma’lum qilindi. Bu haqda “ITAR-TASS” xabar berdi.
Ma’lumotlarga ko‘ra, to‘fon natijasida mamlakatning eng ko‘p aholi (17 million kishi) istiqomat qiladigan janubiy Luson orolidagi elektr tarmog‘i ishdan chiqqan, 26 mingdan ziyod uy xarobaga aylangan. Qishloq xo‘jalik yerlarining minglab gektari, ayniqsa, guruch va g‘alla ekilgan hudud qattiq zararlangan.
Infratuzilma va qishloq xo‘jaligiga yetkazilgan iqtisodiy zarar 124 million dollarga teng ekani aniqlandi.
“Ramassun” to‘foni so‘nggi bir yil ichida Filippinda sodir bo‘lgan eng kuchli to‘fon deb qayd etildi. Gonkong observatoriyasida to‘fon epitsentridagi dovulli to‘lqinning tezligi soatiga 205 kilometrni tashkil etayotgani aniqlanib, unga “superto‘fon” maqomi berildi.
Mutaxassislarning aytishicha, to‘fon hozirda janubiy Xitoy va Gonkong tomonga yo‘l olgan. Uning 18-iyul kuni Haynan oroliga yetib kelishi va bu yerda so‘nggi 40 yilda kuzatilmagan eng kuchli bo‘ronga aylanishi taxmin qilinmoqda.
Shuningdek, Guandun provinsiyasi va Guansi-Chjuan hududi ham to‘fonga duchor bo‘lishi mumkin.
Tabiiy ofat Gongkongga katta xavf tug‘dirmayotgan bo‘lsa ham, bu yerda shamol va dengiz to‘lqinlarining kuchayishi kuzatilmoqda.
Izoh (0)