Meksikadagi shahar meri baliq ovi serhosil bo‘lishi uchun timsohga uylandi

Meksikadagi San Pedro Uamelula baliqchilar shaharchasining meri timsohga uylandi, deb xabar berdi Sky News.

Mahalliy irimlarga ko‘ra, timsoh aslida sehrlangan malika bo‘lib, mazkur nikoh baliq, qisqichbaqa singari dengiz mahsulotlarini ovlashda shahar aholisiga omad olib keladi. Mahalliy keksalarning aytishicha, ushbu qadriyat ajdodlardan avlodlarga meros bo‘lib qolgan “buyuk xazina”.

Kelinlik libosi bilan kiyintirilgan “malika” nikoh marosimidan avval San Pedro shahrini aylanib, aholi bilan tanishdi.

Marosimdan so‘ng shahar meri Xoel Vaskes Roxas yosh malika bilan turmush qurish uning orzusi bo‘lganligini aytib, “rafiqa”si bilan raqsga tushdi.

Nikoh marosimi xarajatlari uchun mablag‘ shahar aholisidan yig‘ib olindi. Pul to‘lashdan bosh tortganlar jazolandi.