Germaniya AQSh Markaziy razvedka boshqarmasining Berlindagi rahbarini mamlakatdan ketkazadi

Germaniya hukumati AQSh Markaziy razvedka boshqarmasi (MRB)ning Berlindagi rahbarini mamlakat hududidan jo‘natib yubormoqda, deb xabar berdi Gazeta.ru Reuters nashriga tayanib.

Germaniya hukumati axborot kotibi Shteffan Zaybertning ma’lumotiga ko‘ra, AQSh elchixonasidagi MRB vakiliga mamlakat hududini tark etish haqida buyruq jo‘natilgan. Berlin AQSh foydasiga josuslik amalga oshirilgani bilan bog‘liq ikki holatdan so‘ng shunday qarorga keldi, deb qayd etildi nashrda.

Eslatib o‘tamiz, Berlin va Vashington o‘rtasidagi josuslik mojarolarida ikkinchi gumondor shaxs paydo bo‘lgan edi. Germaniya Federal prokuraturasining bayonotiga ko‘ra, shaxsi ma’lum qilinmagan gumondor uning faoliyatini tekshirish ishlari nihoyasiga yetgunga qadar ozodlikda bo‘ladi.

Germaniya kansleri Angela Merkel, o‘z navbatida, AQSh amalga oshirayotgan josuslik vaqtni zoye ketkazish ekanligini aytdi.