Google kompaniyasi 25-iyun kuni Google I/O konferensiyasida yangi Android L operatsion tizimini taqdim etdi. Bu haqda The Verge nashri xabar berdi.
Operatsion tizimda asosan yangi Material Design konsepsiyasiga asosan vizual ko‘rinishga e’tibor qaratilgan. Android L’da yangi Gmail interfeysi, kichraytirilgan Android tugmalari va burchaklari to‘rtburchakdan doiraviy shaklga o‘tgan ikonkalarni uchratish mumkin.
Roboto shrifti bilan Android L soat, smartfon, televizor kabi istalgan qurilma monitoriga oson moslasha oladi. Shuningdek, ekran qulflangan paytda ham kelgan bildirishnomalarni o‘qish imkoniyati mavjud bo‘ladi.
Beta versiyada bo‘lgan Android L operatsion tizimi keyinchalik Android 5.0 Lollipop deya nomlanadi. Hozirda developerlar yangi operatsion tizimni Nexus 5 yoki Nexus 7 uchun yuklab olishlari mumkin. To‘liq ishlay oladigan Android 5.0 Lollipop operatsion tizimi esa kuzda ishga tushadi, deyiladi Mail.Ru xabarida.
Shuningdek, konferensiyada avtomobillar uchun Android Auto, televizorlar uchun Android TV hamda qo‘l soatlariga mo‘ljallangan Android Wear maxsus tizimlari ham namoyish etildi.
Izoh (0)