Internetning o‘zbek tilida muloqot qiluvchi segmentiga yo‘naltirilgan loyihalarga bag‘ishlangan “Uznet ummoni” konferensiyasining birinchi soni 31-may, shanba kuni Toshkent axborot texnologiyalari universiteti kichik majlislar zalida bo‘lib o‘tdi. Anjuman “Muloqot” saytlar tarmog‘i va TATU tomonidan Newmax kompaniyasi, Technecy kompaniyasi hamda “Kun” nashri bilan hamkorlikda tashkil etildi.
“Kun”ning xabar berishicha, anjumanda o‘zbek tilida sayt, internet-loyiha, mobil dastur ishlab chiqayotgan mutaxassilar duch kelayotgan muammolar muhokama qilindi va ularning yechimlari bo‘yicha takliflar berildi. Xususan, unda bugungi o‘zbek onlayn-jurnalistikasi ahvoli, IT-texnologiyalarni o‘zbekchalashtirish jarayonlari, o‘zbek tilida yozadigan bloggerlar faoliyati, o‘zbekcha kontent yaratish muammolari, o‘zbekcha SMM’ning istiqboli va O‘zbekistondagi IT-kompaniyalar tajribasi haqida so‘z bordi.
Qizg‘in muhokama qilingan mavzulardan biri – o‘zbek yozuvining ikki alifbo – kirill va lotinda olib borilayotgani, bu sayt egalari va internet-resurslar uchun ma’lum ma’noda qo‘shimcha xarajatlarga sabab bo‘layotgani, shu bilan birga, yangi sayt tashkil qiluvchilar oldida saytni qaysi yozuvda olib borish borasida oson bo‘lmagan tanlov yuzaga kelayotgani qayd etildi.
“Men yangi sayt tashkil qilayotganlarni imkon qadar lotin alifbosiga asoslangan yozuvdan foydalanishga chaqirgan bo‘lar edim. Chunki bugungi kunga kelib deyarli barcha operatsion tizimlar lotin alifbosiga asoslangan o‘zbek yozuvi bo‘yicha o‘zbekchaga tarjima qilinmoqda”, — dedi IT-dasturlar va qurilmalarni o‘zbekchalashtirish bo‘yicha mutaxassis Hamza Foziljonov.
Shuningdek, Newmax kompaniyasi va CityTaxi taksi-kompaniyasi rahbarlaridan biri hisoblangan Akmal Payziyev yosh internet-ishbilarmonlarni o‘zlaridagi qo‘rquvlarni yengishga va aynan o‘zlari xohlayotgan ishni qilishga chaqirdi. “G‘oyalaringizni o‘z ichingizda muhokama qilib, o‘ldirib yubormang. Ularni boshqalar bilan muhokama qiling va hayotga tatbiq eting”, — deya maslahat berdi Payziyev.
2014-yilning yanvar—mart oylarida bo‘lib o‘tgan O‘zbloggerlar chempionati tashkilotchisi, huquqshunos va blogger Xushnudbek Xudayberdiyevning ta’kidlashicha, chempionatning ikkinchi fasli uchun, bloggerlarni hakamlar va o‘quvchilar tomonidan baholab borish imkonini beradigan portal ishlab chiqiladi va uning mukofot jamg‘armasi 13—16 million so‘mni tashkil etadi hamda bosh g‘olibga, homiylar yordamida 10 million so‘m miqdorida mukofot puli berilishi rejalashtirilmoqda.
“Uznet ummoni” konferensiyasi tashkilotchisi Farhod Fayzullayevning ma’lum qilishicha, konferensiyaning keyingi soni futbol bo‘yicha 2014-yilgi jahon chempionatidan so‘ng o‘tkazilishi kutilmoqda. Unda mehmon sifatida ushbu musobaqani bevosita yoritishda qatnashadigan Uff.uz jamoasi ham ishtirok etishi kutilmoqda.
Izoh (0)