Tailand armiyasi 20-may, seshanba kuni siyosiy inqiroz qamrab olgan qirollikda harbiy holat e’lon qildi, deya xabar bermoqda Agence France-Presse axborot agentligi ma’lumotiga asoslanib “Kun”.
Harbiylarning ushbu qarori 28 kishining o‘limi va yuzlab kishilarning tan jarohatlariga sabab bo‘lgan bir necha oylik hukumatga qarshi ommaviy norozilik namoyishlaridan so‘ng tartibni tiklash zarurati bilan bog‘liqligi qayd etildi.
Qo‘mondonlikning rasmiy bayonotida qayd etilishicha, harbiy holatning joriy etilishidan maqsad — “insonlar uchun tinchlik va tartibni qayta tiklashdan iborat”. Harbiylarning qayd etishlaricha, ushbu harakat davlat to‘ntarishi emas. Ayni vaqtda, harbiy holatni joriy etish masalasida amaldagi muvaqqat hukumat bilan hech qanday maslahatlashuvlar amalga oshirilmagan.
Tailand Konstitutsiyasiga asosan, jamiyatda shoshilinch xavfsizlik choralarini ko‘rish zarurati tug‘ilganida, armiya butun mamlakatda harbiy holat e’lon qilish huquqiga ega.
Mamlakatdagi muxolifat 2013-yil noyabrdan beri “qizil ko‘ylaklilar” hukumatining iste’fosini va hukumat vazifasini bajaradigan saylanmaydigan “xalq kengashi”ni tashkil etishni talab qilayotgan edi.
7-may, chorshanba kuni Tailand Konstitutsiyaviy sudi mamlakat bosh vaziri vazifasini bajaruvchi Yinglak Chinavat o‘z lavozimini tark etishi kerakligi haqida qaror chiqargan edi. U o‘z vakolatlarini suiiste’mol qilishda ayblangan edi.
Hukumatga qarshi norozilik namoyishlari ishtirokchilari yaqin kunlar ichida “yakuniy jang”ga kirishishga va’da bergan edi. Namoyish yetakchilari hozirgi vaqtda hukumat qarorgohining bir qanotini egallab turibdi.
O‘z navbatida, “qizil ko‘ylaklilar” — Yinglak Chinavat va uning 2006-yilgi davlat to‘ntarishi natijasida hokimiyatdan chetlatilgan akasi Taksin Chinavat tarafdorlarining ogohlantirishicha, agar hokimiyat muxolifat talab qilganidek saylab qo‘yilmaydigan shaxslar qo‘liga topshiriladigan bo‘lsa, mamlakatda fuqarolar urushi xavfi kelib chiqishi mumkin.
Izoh (0)