“VKontakte” ijtimoiy tarmog‘i asoschisi Pavel Durov Rossiyani butunlay tark etdi. Bu haqda u TechCrunch blogiga bergan intervyusida ma’lum qilgan. “Men Rossiyada emasman va ortga qaytishni umuman rejalashtirmayapman. Afsuski, hozirgi paytda mamlakat internet biznesni yuritishga umuman mo‘ljallanmagan”, — dedi u. Durov o‘zining kelgusidagi faoliyatiga oydinlik kiritib, mobil telefonlar uchun ijtimoiy tarmoq yaratishini aytgan.
“VKontakte” mas’uliyati cheklangan jamiyati 21-aprelda Durovning o‘z arizasiga ko‘ra ishdan ketganini e’lon qilgan edi. Durovning aytishicha, u ishdan ketish haqidagi o‘z arizasini qaytarib olgan, biroq bu “qoidalarga zid” deb topilgan.
Keyinchalik “VKontakte” tarmog‘ining 48% aksiyalariga egalik qiladigan UCP fondi sarmoyadorlardan bemaslahat amalga oshirilgani uchun Durovning ishdan bo‘shatilishi to‘g‘risidagi buyruq asossiz ekanini bildirgan. Bunga javoban tarmoqning ijrochi direktori Dmitriy Sergeyev Durovning ishdan ketishi masalasi yuridik nuqtai nazardan tamomila hal qilingani va aksiyadorlardan birining roziligini olish hech qanday ahamiyat kasb etmasligini aytgan.
Izoh (0)