O‘zbekistonda xizmat ko‘rsatgan artist Sevara Nazarxon Rossiya Birinchi kanalidagi “Toch v toch” (“Xuddi o‘zginasi”) shousining yettinchi turida “Tungi snayperlar” (“Ночных снайперов”) guruhining solisti Diana Arbenina qiyofasida sahnaga chiqdi. Bu haqda 12uz.com xabar berdi.
Navbatdagi bosqichda Sevara Diana Arbeninaning “Sen menga atirgullar sovg‘a qilarding” (“Ты дарила мне розы”) ashulasini ijro etdi.
Hakamlar hay’ati a’zolari: Leonid Yarmolnik, Lyubov Kazarnovskaya va Gennadiy Xazanov Sevaraning chiqishini a’lo darajada deb baholadi va maksimal 15 ball qo‘ydi. Gennadiy Xazanov o‘zbek xonandasiga baho qo‘yar ekan shunday dedi:
Sevara shouning boshlanishida “Men faqatgina qo‘shiqchiman, aktrisa emasman”, — degan edi. Bugun u haqiqiy aktrisaga aylandi.Yana bir hakamlar hay’ati a’zosi Maksim Averin Sevarani Diana Arbeninadan ko‘ra ko‘proq xonanda Zemfiraga o‘xshab qolgan, deb hisobladi va chiqishini to‘rt ball bilan baholadi. Keyinroq, betaraf hakam — Rossiya xalq artisti Lev Leschenko Sevaraning ijrosini 5 ballga loyiq, deb topdi va u jami 24 ball yig‘di.
Eslatib o‘tamiz, Sevara Nazarxon mazkur shouning birinchi raundida 23 ochko bilan beshinchi o‘rinni, ikkinchi bosqichida 21 ochko bilan to‘qqizinchi o‘rinni, uchinchi turida 25 ball to‘plab, to‘rtinchi o‘rinni egallagan edi. To‘rtinchi raundda Sevara Dmitriy Koldun va Irina Dubsova bilan bir xil — 24 ball, beshinchi bosqichda 23 ball, oltinchi turda esa 24 ball yig‘gan edi.
Izoh (0)