Snouden AQSh maxsus xizmatini fosh qilgani uchun mukofotga sazovor bo‘ldi

AQSh maxsus xizmatining sobiq xodimi Edvard Snouden Ridenaur mukofotining “haqiqat uchun” yo‘nalishidagi sovrindori bo‘ldi. Bu haqda New York Times xabariga tayanib “RIA Novosti” ma’lumot berdi.

Snouden bilan birgalikda xuddi shu yo‘nalishdagi sovrinni unga maxfiy hujjatlarni fosh etishda yaqindan ko‘mak bergan rejjisor va jurnalist Laura Poytres ham qo‘lga kiritadi.

Ushbu sovrin Milliy Institut (The Nation Institute) hamda Fertel fondi (Fertel Foundation) tomonidan Vyetnam urushining faxriy qatnashchisi, jurnalist va o‘zining bir qator shov-shuvli tergov ishlari bilan mashhur bo‘lgan Ron Ridenaur sharafiga ta’sis etilgan. Unda to‘rtta yo‘nalish bo‘yicha sovrinlar mavjud: “haqiqat uchun”, “jasurlik uchun”, “eng yaxshi kitob uchun” va “eng yaxshi hujjatli film uchun”.

O‘z vaqtida AQShning 39-prezidenti Jimmi Karter, jurnalist Gloriya Staynem, amerikalik jurnalist Entoni Shadid mazkur mukofot laureatlariga aylangan. Ilk sovrin 2004-yilda topshirilgan.

Hakamlar hay’ati a’zolaridan biri Daniel Brayanning ma’lum qilishicha, Poytresning maxfiy hujjatlarni fosh etishdagi xizmatlari yetarlicha baholanmagan. “Agar Laura bo‘lmaganida, biz Snouden haqida hech narsa bilmagan bo‘lar edik”, — deydi u.

Uning so‘zlariga ko‘ra, Snouden nomzodi bahsga sabab bo‘lgan. “Ko‘p narsalar noma’lum, biz bu ishning tarixini yaxshi bilmaymiz. Bu esa bizni ancha o‘ylanishga majbur etdi. Ammo biz Snouden oshkor etgan dallilarning mamlakat siyosiy hayotiga chuqurroq nazar tashlashda asosiy omil bo‘lganligini inkor eta olmaymiz”, — deydi u.

Eslatib o‘tamiz, Snouden 2013-yili AQSh va Britaniya maxsus xizmatlarining noqonuniy faoliyati haqida Washington Post va Guardian nashrlariga axborot bergan edi. MXAning so‘zlariga ko‘ra, jurnalistlar ixtiyoriga ana shunday ma’lumotlardan 200 mingtasi kelib tushgan bo‘lishi mumkin. Aynan shundan so‘ng Snouden Gongkongga uchib ketgan. O‘tgan yilning 23-iyunida esa Moskvadagi “Sheremetyevo” aeroportining tranzit hududida qo‘nim topgan. 2013-yilning avgustida u Rossiyada 1 yil muddatga vaqtinchalik joylashgan edi.