Yurist va bloger Otabek Mahkamov Ichki ishlar vazirligi akademiyasi rahbari Rustam Hotamov bilan uchrashgach, akademiyada dam olish kunlari erkinlikka chiqishni istagan kursantlardan pora olish kabi illatlar bartaraf etilganini yozdi. Bu haqda u Facebook’dagi sahifasida maʼlum qilgan.
Bugun O‘zbekiston IIV akademiyasi rahbari Hotamov Rustam Abdug‘aniyevich bilan uchrashdim. 20 yil avval men shu dargohning “Tergov faoliyati” fakultetini tugatganman. O‘sha paytlar men va ko‘plab tinglovchilar uchun murakkab davrlar edi. Shuning uchun men bir orzu bilan yashaganman. Akademiyada tartib-intizom bilan bir qatorda, bilim ham ustuvor bo‘lsa edi, derdim. Ammo u paytlarda bilim olish emas, balki archa ekish, naryadlar va ayniqsa Jizzax va Sirdaryo viloyatlarida oylab “maza qilib”, kuniga 100 kilo norma paxta terish birinchi o‘rinda turar edi, deydi bloger.
Otabek Mahkamovning maʼlumot berishicha, akademiyaga Rustam Hotamov tayinlangach, ko‘plab illatlar tugatilgan.
Bugun Shavkat Mirziyoyev tomonidan o‘tkazilayotgan jiddiy islohotlar davri. Bu o‘zgarishlarni amalga oshirish uchun o‘z kasbini hurmat qiladigan rahbarlarni tayinlash — ushbu islohotlarning asosiy qismlaridan biridir. Bugun aynan shunday rahbar bilan tanishdim. Rustam Abdug‘aniyevich akademiya rahbari bo‘lib tayinlanganidan so‘ng, quyidagi “ajoyib” usullarni bekor qildi.
Jumladan, paxta terimi, naryadda turish, xo‘jalik ishlarida faol ishtirok etish, 10–15 kilometrlik yugurishlarni tinglovchilarga jazo sifatida qo‘llash, rahbarlarning kayfiyati yomon bo‘lganida tunda soat 03:00 da trevoga eʼlon qilib, talabalarni uyg‘otib, ularni tomosha qilish, kuniga 500 kishi kirib-chiqadigan hojatxonalarni tozalash uchun starshinaga yoqmay qolgan bitta men kabi kursantni tayinlash, deb yozadi u.
Yurist baʼzan o‘tmishga nazar solib, shunday “ajoyib” usullar ustuvor bo‘lgan dargohda o‘qigandan afsuslanishini yozgan.
Men o‘tmish va kelajak bilan emas, balki bugungi kun bilan yashaydigan insonman. Bugun akademiyada bilim ustuvor. Agar menda O‘zbekistonda qaytadan o‘qish imkoni bo‘lganida, hech ikkilanmasdan yana shu akademiyani tanlagan bo‘lar edim”, deydi u.
Rustam Abdug‘aniyevich Hotamov 2021-yil akademiyaning yangi rahbari bo‘lgan edi. U shu munosabat bilan 2018-yil avgustidan buyon egallab turgan ichki ishlar vazirining o‘rinbosari — Kadrlar bosh boshqarmasi boshlig‘i lavozimini tark etgandi. Hotamovga qadar akademiyaga 2016-yildan beri general-leytenant Bahodir Ahmedovich Matlyubov rahbarlik qilib kelgan.
Izoh (0)