Rossiya Federatsiyasining Krakovdagi bosh konsulxonasi o‘z faoliyatini kamida 30 kundan so‘ng yakunlashi lozim. Bu haqda Polsha tashqi ishlar vaziri o‘rinbosari Xenrika Mossitskaya-Dendis ma’lum qildi.
“Poznandagi konsullik bilan bo‘lgani kabi, Rossiya tomoniga diplomatik muassasani yopish uchun odatda kamida 30 kunlik muddat beriladi”, deb aytdi diplomat TVP Info telekanali jonli efirida o‘tkazilgan brifingda.
Shuningdek, Polsha TIV rahbari o‘rinbosari jurnalistning persona non grata deb e’lon qilinadigan konsullik xodimlari haqidagi savoliga javob bergan.
“Bu qaror faqat diplomatlarga tegishli. Yordamchi va ma’muriy xodimlarga bu qaror taalluqli emas”, deya izoh berdi Mossitskaya-Dendis.
Ma’lumotlarga ko‘ra, Rossiyaning Krakovdagi bosh konsulxonasida 3 nafar diplomat va 4 nafar ma’muriy-texnik xodim akkreditatsiyadan o‘tgan.
12-may kuni Polsha TIV rahbari Radoslav Sikorskiy Rossiyaning Krakovdagi bosh konsulxonasini yopish to‘g‘risidagi qarorni e’lon qildi. U bu chorani o‘tgan yilning may oyida yong‘in yuz bergan Marivilskaya ko‘chasidagi savdo markaziga o‘t qo‘yishda Rossiya maxsus xizmatlarining isbotlangan ishtiroki bilan asosladi. Rossiya TIV rasmiy vakili Mariya Zaharova Moskva yaqin kelajakda Varshavaning noo‘rin qadamlariga munosib javob berishini ma’lum qildi.
Rossiya Federatsiyasi va Polsha munosabatlari so‘nggi yillarda sezilarli darajada yomonlashdi. Moskva Varshavani keskin rusofobiyada aybladi. Polsha hukumati Rossiya Federatsiyasining tanqidi va e’tirozlariga qaramay, sovet yodgorliklarini buzmoqda, Rossiya mulkini musodara qilmoqda. Varshavaning xatti-harakatlariga javoban Moskva Polshani dushman davlatlar ro‘yxatiga kiritdi. Shuningdek, o‘nlab polshalik diplomatlar va konsullik xodimlarini mamlakatdan chiqarib yubordi.
Izoh (0)