Hindiston va Pokiston harbiy operatsiyalari qo‘mondonlari ikki mamlakat o‘rtasidagi o‘t ochishni to‘xtatish to‘g‘risidagi kelishuvni muhokama qilmoqda. Bu haqda News18 telekanali xabar bermoqda.
“Hindiston va Pokiston harbiy operatsiyalari qo‘mondonlari ikki mamlakat o‘rtasida o‘t ochishni to‘xtatish bo‘yicha kelishuv yuzasidan muzokaralar olib bormoqda”, deyiladi telekanal xabarida.
Harbiy operatsiyalar qo‘mondoni lavozimi Hindiston armiyasidagi eng nufuzli lavozimlardan biri hisoblanadi. U bevosita armiya shtabi boshlig‘iga bo‘ysunadi hamda mamlakat ichkarisida va tashqarisidagi barcha harbiy operatsiyalarni rejalashtirish va o‘tkazishda hal qiluvchi rol o‘ynaydi.
Hindiston va Pokiston o‘rtasidagi munosabatlar 22-aprel kuni Hindistonning Jammu va Kashmir hududidagi Paxalgam shahri yaqinida sodir etilgan teraktdan so‘ng yana bir bor keskinlashdi. Terrorchilar hujumi natijasida 25 nafar hindistonlik va bir nafar nepallik halok bo‘ldi. Hindiston hujumga Pokiston maxsus xizmatlari aloqadorligi haqida dalillarga ega ekanini ma’lum qildi. Pokiston Bosh vaziri Shahboz Sharif Hindistonning Kashmirdagi teraktga Islomobodning aloqasi borligi haqidagi ayblovlarini rad etdi.
7-mayga o‘tar kechasi Hindiston mudofaa vazirligi Paxalgamdagi teraktga javoban “Sindur” operatsiyasini o‘tkazgani, Pokiston hududidagi "terrorchilik infratuzilmasi"ga zarba berganini ma’lum qildi. Vazirlik ta’kidlashicha, operatsiya doirasida Pokistonning birorta harbiy obyektiga hujum qilinmagan. O‘z navbatida, Pokiston hukumati Hindiston Pokistonning beshta aholi punktiga hujum qilgani, zarbalar oqibatida o‘nlab odamlar halok bo‘lganini bildirdi. Pokiston Tashqi ishlar vazirligi Islomobod tegishli javob berish huquqini o‘zida saqlab qolishini ma’lum qildi.
Hindiston va Pokiston 10-may kuni soat 17:00 dan boshlab quruqlikda, havoda va dengizda barcha otishmalar va harbiy harakatlarni to‘xtatishga kelishib oldi. Bir necha soat o‘tgach, Hindistonning Jammu va Kashmir ittifoqdosh hududi rahbari Umar Abdulla Jammu va Kashmirning yozgi poytaxti Srinagar shahri yaqinida portlash ovozlari va Hindiston havo mudofaasi ishlari haqida xabar berdi. Biroq, ketma-ket ikkinchi kecha Hindiston armiyasi Pokiston tomonidan tartib buzilishlarini kuzatmayotganini aytmoqda.
Izoh (0)