Озиқ-овқат олиш учун ёрдам тарқатиш пунктига бораётган камида 36 нафар фаластинлик Исроил кучлари томонидан ўлдирилган. Ғазо соғлиқни сақлаш расмийлари ва Хон Юнисдаги ал-Нассер шифохонасининг маълум қилишича, воқеа 19 июль куни эрта тонгда юз берган.
Исроил ҳарбийлари мазкур ҳолат юзасидан баёнот чиқариб, ёрдам тарқатиш пунктидан бир километр масофадаги қўшинларга яқинлашган шахсларга қарата “огоҳлантирувчи ўқ узилгани”ни таъкидлаган. Яҳудий расмийларининг иддао қилишича, фаластинликлар гўёки тўхташ ҳақидаги чақириқларга бўйсунмаган. Бироқ ғазоликлардан бири Муҳаммад ал-Холидий воқеани бошқача тасвирлади:
“Биз улар сафни тартибга келтириш учун чиқди деб ўйладик, бирданига ҳар икки томондан жип ва танклар чиқиб, бизга қарата ўқ узишни бошлади”, деди у.
ГҲФнинг позицияси
АҚШ томонидан қўллаб-қувватланган Ғазо Гуманитар Фонди (ГҲФ) воқеа тарқатиш пунктлари очилишидан олдин, қолаверса улар назорат қиладиган ҳудуддан бир неча километр узоқликда содир бўлганини таъкидлади. Ташкилот, шунингдек, одамлар тарқатиш пунктларига кечаси келмаслик ҳақида огоҳлантирилганини даъво қилди.
“Ҳалок бўлганларнинг аксарияти бизнинг энг яқин пунктимиздан бир неча километр узоқда бўлган”, дейилади ГҲФ баёнотида.
Аммо ташкилотнинг ўзи ҳам гуманитар ёрдам олиш учун келган тинч аҳолининг ваҳшийларча ўққа тутилиши сабаб салбий репутация қозониб бўлди. БМТнинг Женевадаги инсон ҳуқуқлари бўйича идораси маълумотига кўра, охирги олти ҳафтада ёрдам пунктлари ва озиқ-овқат карвонлари атрофида 875 киши ҳалок бўлган.
Бироқ ГҲФ тарқатиш пункти яқинида юз берган ҳолат ягона кейс эмас. 19 июль куни анклавнинг бошқа ҳудудларида ҳам яна камида 50 киши ўлдирилди. Жумладан, Нусейрат лагерида ҲАМАС назоратидаги полиция бошлиғи ва унинг 11 нафар оила аъзоси нишонга олинди. Исроил армияси эса тинч аҳолига зарба берилганини инкор қилиб, қурол омборлари ва снайперларнинг позициялари нишонга олинганини иддао қилди.
Қонли можаро
2023 йил 7 октябрь санасидан сўнг бошланган қатлиомлар сабаб 58 мингдан ортиқ фаластинлик ҳалок бўлган. Уларнинг аксари аёллар ва болалар эди. Анклавнинг деярли барча аҳолиси ўз уйларидан кўчирилган, ҳудуд вайронага айланган.
Айни дамда Исроил ва ҲАМАС Доҳада билвосита музокаралар олиб бормоқда. Уларга АҚШ, Миср ва Қатар воситачилик вазифасини бажаряпти. Томонлар 60 кунлик сулҳ ва гаровдагиларни озод қилиш каби масалаларни муҳокама қилмоқда. Аммо ҳозирча натижа йўқ.
Изоҳ (0)