Саудия Арабистонининг “уйқудаги шаҳзодаси” вафот этди. У 20 йил кома ҳолатида сақланган.
Ачинарли қисмати сабаб “Уйқудаги шаҳзода” номи билан танилган Алвалид бин Холид бин Талал ал Сауд оғир йўл-транспорт ҳодисаси сабаб кома ҳолатига тушиб қолган. У 1990 йили туғилган бўлиб, шаҳзода Холид бин Талал ал Сауднинг тўнғич ўғли, миллиардер шаҳзода Алвалид бин Талалнинг эса жияни эди.
Шаҳзода Лондон ҳарбий лицейида таҳсил олаётганда 2005 йили йўл-транспорт ҳодисасига учраб, бош мия жароҳати ва ички қон кетишидан азият чеккан. Ўшанда у атиги 15 ёш эди. Шошилинч тиббий ёрдам, АҚШ ва Испаниянинг энг яхши мутахассислари томонидан кўрсатилган ёрдамга қарамай, шаҳзода ҳушига келмаган.
У комада 20 йилдан зиёд ётди. Бироқ вақти-вақти билан кузатиб туриладиган беихтиёр ҳаракатлар оилада умид уйғотарди. Шаҳзоданинг отаси Холид бин Талал ўғлининг ҳаётини узайтириш воситаларини олиб ташлаш ҳақидаги таклифларни қатъиян рад этиб, фарзандининг соғайишидан умид узмади.
Шаҳзоданинг вафоти ҳақидаги хабар яшин тезлигидан тарқалди. Тармоқларда оилага ҳамдардлик билдирилиб, “Уйқудаги шаҳзода” (#SleepingPrince) хештеги оммалаштирилди.
Изоҳ (0)