Исроил бош вазири Биньямин Нетаньяху яроқсиз овқатдан заҳарланган, у тегишли муолажалар олмоқда. Бу ҳақда унинг идорасига таяниб, The Times of Israel хабар берди.
Сиёсатчи 20 июлдан бошлаб уч кун давомида уйида дам олади. У ўз вазифаларини масофадан туриб бажаришда давом этади. 75 ёшли Нетаньяху тунда ўзини ёмон ҳис қилган. Тиббий текширувлар натижасида унда ичак яллиғланиши ҳамда сувсизланиш аниқланган. Ҳозирда Исроил бош вазирига томир орқали суюқлик юборилмоқда.
Шифокорлар тавсиясига биноан, бош вазир кейинги уч кунни уйида ўтказади ва у ердан туриб давлат бошқаруви билан шуғулланади, дейилади расмий баёнотда.
Маълумот учун, Нетаньяхуга 2023 йилда юрак ритмини назорат қилувчи қурилма — кардиостимулятор ўрнатилган. 2024 йил декабрь ойида эса унга сийдик йўллари инфекцияси ташхиси қўйилган ва шундан сўнг простата бези жарроҳлик йўли билан олиб ташланган.
Ўша йилнинг март ойида у чурра (грижа) бўйича операцияни бошдан кечирган. Шундан кейин эса гриппга чалиниб, бир неча кун ишга чиқа олмаган.
Изоҳ (0)