Покистоннинг Панжоб провинциясида 16 июль куни шиддатли муссон ёмғирлари бошланди. Мамлакатда табиий офат сабаб сўнгги 24 соат ичида 63 киши ҳалок бўлиб, 290 киши жароҳатланди. Бу ҳақда BBC хабар берди.
Табиий офатларни бошқариш миллий бошқармасига кўра, қурбонларнинг аксариятини бинолар босиб қолган. Қолганлари эса чўкиб кетган ёки электр токи уриши оқибатида ҳалок бўлган. Равалпинди шаҳри расмийлари 17 июль кунини барчага дам олиш куни деб эълон қилган. Шаҳар ичидан оқиб ўтувчи дарё яқинида яшовчилар эса эвакуация қилинган.
Сув тошқинлари Панжоб провинцияси бўйлаб бир нечта тезюрар йўлларни ёпиб қўйган. Ўнлаб самолёт рейслари бекор қилинган ёки кечиктирилган. Провинция ҳокими Марям Навоз 17 июль куни бир қатор ҳудудларда фавқулодда ҳолат эълон қилган.
“Ҳукумат муассасалари бор куч-ғайрати билан ишламоқда. Аҳолини хавфсизлик қоидаларига қатъий риоя қилишга чақираман”, деган у.
Чаквал шаҳрида ўтган 24 соат ичида 400 миллиметр ёмғир ёғган. Одамларни эвакуация қилиш учун қутқарув қайиқлари сафарбар қилинган. Кучли сув босган ҳудудлардан аҳоли вертолётлар ёрдамида қутқарилмоқда. Панжоб ҳукумати бу ҳафта яна ёмғир ёғиши ва сел давом этиши ҳақида маълумот берган.
Июнь ойида бошланган муссон сабаб шу кунгача ҳалок бўлганларнинг умумий сони 180 нафарга етган. Уларнинг ярмидан кўпи болалар.
250 миллионга яқин аҳолига эга Покистонда табиий офатлар тез-тез содир бўлади. Мамлакатга 2022 йили ёпирилган муссон сув тошқинлари ҳудуднинг учдан бир қисмини сув остида қолдирган ва 1700 кишини ҳаётдан олиб кетган. Ҳодиса маҳаллий иқтисодиётга 30 миллиард доллардан ортиқ зарар келтиргани маълум қилинган.
Изоҳ (0)