Иқтисодий тадқиқотлар ва ислоҳотлар маркази Ўзбекистон кўчмас мулк бозоридаги сўнгги ўзгаришлар бўйича таҳлилий маълумотларни “Дарё”га тақдим қилди.
2025 йилнинг биринчи ярим йиллиги якунларига кўра, республикада уй-жой савдолари ўтган йилнинг шу даврига нисбатан ўн фоизга ошиб, 136 минг 500 хонадонга етган. Июнь ойининг ўзида 21 мингта кўчмас мулк олди-сотди битимлари рўйхатдан ўтказилган. Бу ҳам ўтган йилнинг шу ойига нисбатан уч фоиздан кўп.
Ҳудудлар бўйича ҳолат
Вилоятлар кесимида кўчмас мулк бозори барқарор ўсишда давом этмоқда. Энг катта ўсиш Жиззах вилоятида 29,9 фоиз, Навоий вилоятида 18,3 фоиз ва Сурхондарё вилоятида 17,7 фоиз қайд этилган. Айни пайтда Тошкент вилоятида савдо ҳажми 2,6 фоизга камайган.
Иккиламчи уй-жой бозори
Июнь ойида Ўзбекистонда иккиламчи бозордаги уй-жой нархлари май ойига нисбатан унча катта бўлмаган, учдан бир фоиз атрофида ошган. Йиллик ҳисобда эса нархлар қарийб икки фоизга кўтарилган.
Жиззах вилоятида июнь ойида уй-жой нархлари бир оз пасайган бўлса-да, йил давомида ўсиш қарийб ўн икки фоизни ташкил этган. Сурхондарё, Хоразм, Наманган вилоятлари ва Қорақалпоғистон Республикасида ҳам уй-жой нархлари йилдан йилга ошиб бормоқда.
Тошкент шаҳридаги ҳолат
Тошкентда иккиламчи уй-жой бозори бир оз секинлашган. Ўтган йилга нисбатан нархлар деярли беш фоизга пасайган. Янги қурилган уйлар сегментида ҳам пасайиш кузатилган, аммо бу фақат икки фоиз атрофида.
Иккиламчи бозорда энг катта тушиш Мирзо Улуғбек, Яшнобод ва Чилонзор туманларида қайд этилган. Янги қурилган уйлар эса Учтепа, Юнусобод ва Шайхонтоҳур туманларида сезиларли арзонлашган.
Ижара бозори барқарор
Тошкент шаҳрида июнь ойида уй-жой ижара нархлари ўзгармаган. Ҳозирда ижара нархи бир квадрат метр учун ўртача 8 доллар атрофида.
Миробод, Шайхонтоҳур ва Яккасарой туманларида ижара нархлари энг юқорилигича қолмоқда — бир квадрат метр учун ўртача 10 доллар.
Йиллик ҳисобда ижара нархлари икки фоиздан кўпроқ пасайган. Энг катта тушиш Учтепа, Яшнобод ва Чилонзор туманларида кузатилган.
Ўзбекистонда 2024 йилда 100 264 та хонадон аҳолига топширилгани маълум қилинди.
2024 йилда 2 044 та кўп квартирали уй фойдаланишга топширилган. 2022–2024 йиллар давомида жами 4 920 та кўп квартирали уй қурилиб, уларда 221 мингдан ортиқ хонадон аҳолига топширилган.
Йиллик кўрсаткичлар қуйидагича:
- 2022 йилда 1 433 та уй (56 115 та хонадон);
- 2023 йилда 1 443 та уй (65 528 та хонадон);
- 2024 йилда 2 044 та уй (100 264 та хонадон).
Таъкидланишича, ногиронлиги бўлган шахслар, етим болалар ва кам таъминланган оилалар учун мўлжалланган ижтимоий аҳамиятга эга уй-жойлар сони ҳам ортиб бормоқда.
Шунингдек, “Янги Ўзбекистон” массивларида олиб борилаётган қурилиш ишлари ҳам изчил давом эттирилмоқда. 2025 йилга келиб бундай массивлар сони 29 тадан 56 тага етказилган. Айни пайтда ушбу массивларда 890 та уй қурилиб, 31 692 та хонадон фойдаланишга топширилган.
Уй-жой сотиб олиш учун субсидиялар
Вазирлар Маҳкамасининг 2024 йил 11 ноябрдаги қарори билан уй-жой сотиб олиш учун субсидиялар ажратиш тартибига ўзгартириш ва қўшимчалар киритилди. Қарор билан субсидиялар билан қопланадиган фоиз тўловлари миқдорига ҳам ўзгартириш киритилди. Эндиликда янги кредитлар учун йиллик 12 фоиздан юқори қисми, 2025 йилдан бошлаб эса Марказий банкнинг асосий ставкасидан ортиқ қисми қопланади.
Бошланғич тўлов ва фоизларнинг бир қисмини қоплаш учун субсидиялар Иқтисодиёт ва молия вазирлиги томонидан беш иш куни ичида тўланади.
Изоҳ (0)