Бразилия президенти Лула да Сильва америкалик ҳамкасби Дональд Трамп “дунё императори бўлиш учун сайланмагани”ни маълум қилди. Бу ҳақда CNN хабар берди.
Сиёсатчи шу тариқа президент Трампнинг божлар солиш бўйича таҳдидларига жавоб қайтарди. АҚШ президенти 1 августдан бошлаб Бразилия товарларига 50 фоизлик бож солинишини айтганди. Шунингдек, мамлакат собиқ президенти Жаир Болсонарога қарши суд ишини тўхтатишга чақирганди. Судланаётган шахс АҚШнинг амалдаги президенти ва унинг оиласи билан яқин алоқаларга эга.
Болсонару 2022 йилги президентлик ғалабасидан сўнг Лулани ағдаришга урингани учун судланмоқда. Агар у давлат тўнтаришини уюштиришда айбдор деб топилса, 40 йилдан ортиқ вақтга қамалиши мумкин.
Бразилия президенти Трамп мамлакатнинг ички савдо ва суд ишларига аралаша олмаслигини таъкидлаган. Шунингдек, АҚШ томонидан жорий этиладиган божларни “мантиқсиз” деб атаган.
Бож ставкаси нафақат миқдори билан, балки эълон қилинган услуби билан ҳам мени ҳайратга солди. Президент Трамп АҚШни бошқаришга сайланганини, дунё императори эмаслигини унутмаслиги керак... Бразилияда суд ҳокимияти мустақил. Президентнинг бу жараёнга ҳеч қандай таъсири йўқ.
Бразилия ўз манфаатларини ва Бразилия халқининг манфаатларини ҳимоя қилиши керак, бошқаларнинг манфаатларини эмас. Бразилия унга мажбурлаб қабул қилдириладиган ҳеч нарсани қабул қилмайди. Биз музокараларни маъқуллаймиз, деган Лула.
Шунингдек, у Трампнинг АҚШда 6 январь воқеалари чоғида қилган ҳаракатларига ишора қилиб, агар бу ҳодисалар Бразилияда содир этилганида, Трамп судланиши муқаррар бўлишини таъкидлади.
Агар Трамп бразилиялик бўлганида ва Капитолий тепалигида содир бўлган воқеани амалга оширганида, у ҳам Бразилияда судланарди. Эҳтимол, у конституцияни бузган бўларди. Адолатга кўра, агар у буни Бразилияда қилган бўлса, у ҳам ҳибсга олинарди, деган Лула да Сильва.
Президентнинг сўзларига кўра, Болсонаро шунчаки шахс сифатида эмас, балки “тўнтариш уюштиришга уринган амаллари учун” суд қилинмоқда.
Маълумот учун, Трамп Бразилия БРИКСдаги фаолиятини давом эттирса, бу мамлакатга нисбатан юқори божлар жорий этилиши мумкинлигини айтган. У ушбу блокни “Ғарбга қарши йўналтирилган” деб атаб, БРИКС билан ҳамкорлик қилувчи ҳар қандай давлатга иқтисодий босим ўтказиш билан таҳдид қилган эди.
Трампга қарши Капитолийга ҳужум бўйича айбловлар
2021 йил 6 январь куни Капитолий биносига Дональд Трамп тарафдорлари бостириб кирган. Бу воқеа Жо Байденнинг сайловдаги ғалабасини Конгресс томонидан тасдиқлаш жараёнида юз берган ва бутун дунё эътиборини тортган эди. 2023 йил августида Трампга қуйидаги айбловлар қўйилган эди:
- АҚШ ҳукуматини алдашга уриниш;
- сайлов натижаларини тасдиқлаш жараёнига тўсқинлик қилиш;
- сайловчиларнинг конституциявий ҳуқуқларини бузиш;
- терговни тўсиб қўйиш ва бу борада фитна уюштириш.
Айблов хулосасида Трампнинг ҳаракатлари Капитолий тепалигидаги зўравонликларга бевосита туртки бўлгани таъкидланган. Бироқ сиёсатчи иккинчи муддатга президентликка сайлангач, унга қарши айбловлар бекор қилинган.
БРИКС қандай ташкилот?
Изоҳ (0)