Хитой компаниялари “Бир камар — бир йўл” ташаббуси доирасида мамлакатлар билан тузган янги инвестицион ва қурилиш шартномалари ҳажми рекорд даражага етди. Бу ҳақда Австралиянинг Гриффитҳ университети ҳамда Хитойнинг Яшил молия ва ривожланиш маркази тадқиқотига таяниб, Financial Times хабар берди.
Экспертларга кўра, “Бир камар — бир йўл” доирасидаги битимлар ва инвестицияларнинг умумий қиймати аллақачон 1,3 триллион доллардан ошган. Ушбу суммага қурилиш соҳасидаги 775 миллиард долларлик шартномалар ва 533 миллиард долларлик номолиявий инвестициялар киради. 2025 йилнинг дастлабки олти ойида бу лойиҳага 124 миллиард доллар инвестиция киритилган, жами 176 та битим имзоланган. Таққослаш учун, 2024 йилда жами 122 миллиард доллар инвестиция жалб қилинган эди.
Қозоғистон 2025 йилда ҳамкорлар орасида энг кўп сармоя — 23 миллиард долларни қабул қилди. Ҳудудлар бўйича инвестиция ва қурилиш шартномаларининг умумий қиймати Африкада (39 миллиард доллар) ва Марказий Осиёда (25 миллиард доллар) энг юқори кўрсаткичга эришди.
Хитойнинг “Бир камар — бир йўл” ташаббуси логистика, инфратузилма ва савдони ривожлантириш стратегиясидир. Уни 2013 йил сентябрь ойида Хитой раҳбари Си Цзиньпин тақдим этган эди. Ташаббусга 150 дан ортиқ мамлакат, жумладан, Ўзбекистон ҳам қўшилган. Халқаро валюта жамғармаси маълумотларига кўра, 2018—2023 йилларда Хитойнинг хориждаги активлари 50 фоиздан кўпроққа ошган. Солиштириш учун, АҚШда бу ўсиш атиги 21 фоизни ташкил этган.
Изоҳ (0)