Буюк Британия парламенти сайловда овоз бериш 16 ёшдан бошланиши борасида таклиф киритди. Бу ҳақда The Guardian хабар берди.
Мамлакат ҳукуматининг таъкидлашича, 16 ва 17 ёшдан сайловда иштирок этишни бошлаш “адолатлироқ” бўлади. Сабаби бу ёшдагиларнинг аксарияти иш билан таъминланган ва ҳарбий хизматни ўташга қодир. Бош вазир Кир Стармер солиқ тўлайдиган ўсмирлар “пулнинг қандай сарфланиши” ҳақида ўз фикрларини билдириши муҳимлигини айтган.
Илгари сурилаётган таклиф қабул қилинса, бутун Буюк Британия бўйлаб овоз бериш ёши 16 этиб белгиланади. Шотландия ва Уэлсда бу қонун аллақачон амалиётга татбиқ этилган. Сўнгги марта овоз бериш ёши 1969 йили 21 ёшдан 18 ёшгача пасайтирилганди.
Мамлакатнинг баъзи лейборист депутатлари бу ҳаракат тескари натижа бериши ва кўпроқ чап қанот партияларини қўллаб-қувватлашга туртки бўлишидан хавотирда. Аммо йангилик демократияни кучайтиришни илгари сураётган тарғиботчилар томонидан олқишланган. Консерваторлар эса 16 ва 17 ёшли болалар қонуний равишда чекиши, спиртли ичимлик ичиши ёки лотерея чиптасини сотиб олиши тақиқланганини айтиб, бу қарор “ножўя” эканини билдирган.
“Мени кўпроқ нотўғри маълумот, сохта янгиликлар, одамларнинг бугунги кундаги маълумотларни қандай қабул қилиши хавотирга солмоқда. Шундай экан, қандай қилиб 16-17 ёшли болалар сайловда қатнашиши мумкин? Бу демократияга катта тўсиқ бўлади”, деди депутатлардан бири.
Европада, хусусан, Австрия, Малта, Мен ва Ла-Манш оролларида сайловда қатнашишга 16 ёшдан рухсат берилади. Бразилия, Аргентина ва Куба каби давлатларда ҳам бундай қонун аллақачон амалда қўлланади.
Изоҳ (0)