Шимолий Корея раҳбари Ким Чен Ин очилганига уч ҳафта ҳам бўлмаган туристик курортни хорижликлар учун ёпиб қўйди. Бу ҳақда Bild нашри хабар бермоқда.
Маълум қилинишича, DPR Korea Tour давлат сайти Япон денгизи бўйида жойлашган улкан курорт “вақтинча хорижий сайёҳларни қабул қилмаётгани” ҳақида қисқа хабар эълон қилган. Сабаби ҳамда қанча муддат сайёҳларни қабул қилмаслиги ҳақида маълумот берилмаган. Бироқ айрим нашрлар курортнинг ёпилишини Россия ташқи ишлар вазири Сергей Лавров ташриф буюргани билан боғламоқда.
Таъкидланишича, ўтган икки ҳафта мобайнида курортга фақат шимолий кореяликлар ва россияликларнинг кичик гуруҳи ташриф буюришга улгурган.
Бундан аввал 1 июль куни Шимолий Корея тарихда биринчи марта ўзининг пляж курорти очилиши хабар қилинганди. “Вонсан Калма” номли курорт Шимолий Кореянинг шарқий соҳилида қуриб битказилган.
Ким Чен Иннинг ёшлик даврлари курорт жойлашган Вонсан ҳудудида ўтган. У ерда мамлакатнинг кўплаб элиталари шахсий виллаларга эга. Вонсан бир вақтлар ракета полигони жойлашган шаҳар эди. Мамлакат раҳбари ҳозирда ҳудудни ўзгартиришга ҳаракат қилмоқда.
Дам олиш маскани 20 000 киши ташриф буюришига мўлжалланган. Курорт пляжнинг 4 километр ҳудудини эгаллаб, ўз ичига меҳмонхона, ресторан, савдо марказлари ва аквапаркларни олади. У дастлаб 2019 йил октябрь ойида очилиши керак эди, аммо Cовид пандемиясида қурилиш ишлари кечиктирилган.
Изоҳ (0)