Непал ҳукумати интернетдаги фирибгарликлар сони ортгани боис Telegram мессенжерига киришни чеклаш ёки тўсишни буюрди. Бу ҳақда мамлакат Телекоммуникациялар бошқармаси расмий веб-сайтида маълум қилинди.
Непал идорасининг хабарномасига кўра, мамлакатда онлайн жиноятчилик изчил равишда ўсиб бормоқда. Бунда жиноятчилар кўпинча Telegram’дан ноқонуний хатти-ҳаракатлар, жумладан, пул ювиш учун фойдаланмоқда.
“Шу сабабли барча телекоммуникация хизмати кўрсатувчи провайдерларга Telegram иловасига киришни дарҳол чеклаш ёки тўсиш кўрсатмаси берилди”, дейилади хабарда.
Непал ижтимоий тармоқлардан фойдаланишни илк бор чеклаётгани йўқ. 2023 йил ноябрь ойида TikTok блокланган, аммо кейинчалик бу тақиқ бекор қилинган эди.
Непал хавфсизлик нуқтаи назаридан мессенжерга киришни чеклаган ягона давлат эмас. Илгари жосуслик хавфи туфайли Украинадаги амалдорлар ва ҳарбийлар, Швейцариядаги ҳарбий хизматчилар, шунингдек, Эрондаги амалдорларга Telegram’дан фойдаланиш тақиқланган эди.
Июль ойи бошида Туркияда миллиардер Илон Маскнинг хAI компанияси томонидан ишлаб чиқилган Grok сунъий интеллектли чат-ботига кириш блокланди.
Изоҳ (0)