Исроилнинг 23 июнь куни Теҳрон шаҳридаги Эвин қамоқхонасига берган зарбаси оқибатида 71 киши ҳалок бўлди. Бу ҳақда Эрон суд ҳокимияти вакили Асғар Жаҳонгир маълум қилди.
Амалдорнинг сўзларига кўра, снарядлар қамоқхонанинг бир қатор хоналарига, жумладан, тиббиёт бўлими, муҳандислик-техник корпуси, ташрифлар зали ва суд канселяриясига тушган.
Охирги иккита бино ёнида яшаган одамлар ҳам жабрланган, дея қўшимча қилди у.
Маҳбусларни кўргани келган оила аъзолари ҳам ҳалок бўлгани ёки жароҳатлангани айтилмоқда. Бундан ташқари, жабрланганлар орасида қамоқхона маъмурияти ходимлари, муддатли ҳарбий хизмат аскарлари, маҳкумлар ва уларнинг яқинлари, шунингдек, яқин атрофдаги бинолар аҳолиси бор.
Бир қатор ярадорларга воқеа жойида ёрдам кўрсатилган. Бошқалари шифохоналарга олиб кетилган, яна бир қисми даволанишдан сўнг уйларига жавоб берилган.
Ҳужумдан сўнг қолган маҳбуслар Теҳрондаги бошқа жазони ижро этиш муассасаларига ўтказилган. Эвин қамоқхонасида бир қатор чет элликлар, жумладан, уч йилга озодликдан маҳрум этилган икки француз фуқароси сақланган.
Ҳодиса фуқароларимизни хавф остига қўйди — бу номақбул, деган Франция ташқи ишлар вазири Жан-Ноэл Барро.
Эрон фаоллари фикрича, ҳужум сиёсий маҳбуслар ҳаётини ҳам хавф остига қўйган.
Изоҳ (0)