Хитойнинг йирик шаҳарларида янги ғайриоддий одат оммалашмоқда: ишсизлар маълум миқдорда тўлов қилиб, офисларда вақт ўтказади ва ўзларини иш билан банддек тутмоқда, деб ёзади BBC нашри.
Бундай сохта иш ўринлари хитойликларга одамлар кўз олдида банд инсондек тасаввур уйғотиш, ижтимоий босимдан қочиш ва кундалик тартибни сақлашга ёрдам бермоқда. Айниқса, ёшлар ўртасида ишсизлик даражаси 14 фоиздан ошган шароитида бундай усул кўплаб аҳолига қўл келмоқда.
Масалан, 30 ёшли Шуи Чжоу 2024 йилда муваффақиятсизликка учраган озиқ-овқат бизнесидан сўнг, жорий йил апрель ойида Донггуан (Гонконгдан 114 км шимолда) шаҳридаги Pretend To Work Company (“Ўзини банддек кўрсатиш компанияси”) хизматидан фойдаланишни бошлаган. У ҳар куни 30 юан (4,20 доллар) тўлаб, шу ерга келади ва беш нафар “ҳамкасб”и билан биргаликда ишлаётгандек бўлади.
Бундай офислар иш столи, Wi-Fi, қаҳва, тушлик ва ҳатто мажлис хоналарига эга. Баъзи жойларда эса иш муҳитини янада ҳақиқий кўрсатиш учун сохта топшириқлар берилади, “раҳбар” текширувлари ўтказилади, ҳатто қўшимча тўлов эвазига сериаллардаги каби офис можаролари уюштирилади.
Хитой Миллий статистика бюроси маълумотига кўра, 2025 йил март ойида 16–24 ёшдаги ёшларда ишсизлик 16,5 фоиз, 25–29 ёшдагиларда эса 7,2 фоиз бўлган. Шу сабабли кўпчилик “банд каби кўриниш” йўлини танламоқда.
Ижтимоий тармоқларда, хусусан Хиаоҳонгшу ижтимоий тармоғида бу ҳақда кўплаб реклама ва видеолар тарқалган. “Ишлаётгандек кўринаман” каби хештеглар остида эса минглаб постлар жойланган.
Бундай “сохта иш” офислари ҳозирда Шэньчжэнь, Шанхай, Нанкин, Ухан, Ченду ва Кунмин каби йирик шаҳарларда ҳам пайдо бўлмоқда. Иштирокчилар бу ерда шунчаки ўтириб қолмай, компьютерларда иш қидириш ёки стартап лойиҳаларини бошлашга вақт сарфлаши мумкин.
Сохта офисларга қатнайдиганлар мақсади оддий: улар руҳий босимни камайтириш, кун тартибига амал қилиш ва одамлар олдида обрўсини йўқотмасликни истайди. Бундан ташқари, бундай жойларда вақт ўтказиш кафеларга қараганда арзонроқ тушади ва ҳақиқий иш жойига ўхшаш муҳитни беради.
Бундай офисларда вақт ўтказадиган инсонларнинг айтишича, ҳатто иш бўлмаса ҳам, офис муҳити уларга мотивация беради ва янги иш излашни давом эттиришга ундайди. Фрилансерлар ҳам диққатни жамлаш учун бу имкониятдан фойдаланади.
Изоҳ (0)