Янги ўқув йилининг бошланиши нафақат мактаб остонасига қадам қўяётган болалар, балки ота-оналар учун ҳам ташвишли давр. Бу даврда нафақат дарсларга мослашиш, балки оилавий бюджетни режалаштириш ҳам долзарб масалага айланади. Ўқув қуроллари, мактаб формаси, китоблар — буларнинг барчаси бир вақтнинг ўзида харид қилинса, жиддий маблағ талаб қилади. Аммо қуйидаги оқилона ёндашув билан харажатларни сезиларли даражада камайтириш мумкин.
- Харидларни олдиндан режалаштиринг
Мактаб мавсуми яқинлашгани сайин барча нарсалар нархи кўтарилади. Шу сабабли дафтар-қалам, форма ва бошқа зарур буюмларни иложи борича эрта — ёз бошидаёқ харид қилиш фойдали. Ёзнинг охирига бориб эса, дўконларда турли акциялар ва мавсумий чегирмалардан фойдаланиш мумкин.
- Барча нарсани бирваракай харид қилманг
Фарзандингизни тўлиқ дарсларга тайёр ҳолатда жўнатиш истаги табиий бўлади, лекин харажатлар жиҳатидан бу ҳар доим оқилона эмас. Дастлаб энг керакли нарсаларнигина олиб, йил давомида зарурий эҳтиёж туғилганда қолганини тўлдириб борган маъқул. Акс ҳолда, айрим буюмлар умуман ишлатилмай қолиб кетиши мумкин.
- Мактаб бозор ярмаркаларини ўтказиб юборманг
Август ойининг охирида, айниқса 1 сентябрь арафасида ўтказиладиган мактаб ярмаркалари ота-оналар учун чинакам ёрдам бўлиши мумкин. Бундай ярмаркаларда бир кунда барча керакли нарсани бир жойдан топиш, энг муҳими, арзон нархларда харид қилиш имконияти бўлади.
- Фақат бозор эмас, интернет дўконлардаги чегирмаларни ҳам кузатиб боринг
Одатда бозордаги нархлар дўкондан арзонроқ деб ўйлаймиз. Аммо замонавий савдо марказларида мактаб мавсумига оид турли акциялар, чегирмалар, бонусли карталар, ҳатто банк кешбеклари ҳам бўлади. Улардан фойдаланиб, ҳатто бозор нархидан ҳам арзонга сотиб олиш мумкин.
- Бошқа ота-оналар билан бирга харид қилинг
Якка ҳолда харид қилишдан кўра, дўстларингиз ёки маҳалладошларингиз билан бирлашиб, улгуржи тарзда мактаб анжомларини сотиб олинг. Бу усул дафтар, ручка, рангли қоғоз каби воситаларни сотиб олишда сезиларли даражада пулни тежайди. Ортиқчасини эса бўлиб олиб, келаси йилгача сақлаш ҳам мумкин.
- Уйда қолган ўқув қуролларини кўздан кечиринг
Ҳар йили янгисини олиш шарт эмас бўлган ўқув қуроллари бўлади. Шу сабабли уйда кичик “инвентаризация” ўтказинг. Масалан, ўтган йилдан қолган 12 варақли дафтарлар, қаламлар топилиши мумкин. Ярми ишлатилган бўлса, улардан қоралама сифатида фойдаланиш мумкин. Сақланиб қолган фломастер, рангли қалам, қаламдон, ўчиргичларни ҳам янгилаш шарт эмас.
- Харидлар рўйхатини тузинг ва унга амал қилинг
Аниқ рўйхатсиз мактаб анжомлари учун бозорга борсангиз, рекламалар ва ёрқин дизайнга учиб, керагидан ортиқча нарсалар харид қилишингиз мумкин. Рўйхат тузиб, нимадан нечта кераклигини олдиндан аниқлаб чиқинг. Айниқса, болангизни ўзи билан олиб борсангиз, бу жуда асқатади.
- Ортиқча ҳашамдан сақланинг
Ялтироқ қаламдонлар, безакли дафтарлар, қимматбаҳо брендли ручкалар — буларнинг кўпи кўр-кўрона харажатлар саналади. Болага чиройли, аммо содда буюмлар ҳам етарли бўлади. Асосийси, уларни йўқотмасликка ва эътибор билан ишлатишга болани ўргатиш керак. беринг.
- Ҳам иссиқ, ҳам совуқ мавсум учун кийим-кечакни бирданига харид қилманг
Болалар айниқса ўсмирлик ёшида жуда тез ўсади. Бугун мос келган форма, бир ой ўтиб тор бўлиб қолиши мумкин. Шунинг учун йил бошида фақат кузги мавсумга зарур бўлган кийимларни харид қилиб, кейинроқ аста-секин янгилаб бориш мақсадга мувофиқ.
- Болани жараёнга жалб қилинг
Фарзандингизни ўқув қуролларини харид қилиш жараёнига жалб этинг. Бу орқали сиз уни масъулиятга ўргатасиз ва унга нисбатан мос нархдаги, керакли нарсани танлаш имконини берасиз. Устига устак, бу фарзандингиз учун қизиқарли тажриба, ота-она учун эса реал эҳтиёжни аниқлаш имкони бўлади.
Изоҳ (0)