Венгриянинг Россияга мойиллиги билан танилган бош вазири Виктор Орбан яна Европа Иттифоқига таҳдид қилди. У 2028–2034 йиллар учун Украинага 100 миллиард евро ажратишни назарда тутувчи ЕИ бюджетини қўллаб-қувватламаслигини айтди.
Орбаннинг сўзларига кўра, мазкур лойиҳа Венгрия маблағларини Украинанинг фойдасига ишлатади ва венгриялик фермерларни оғир аҳволга солади. Бундан ташқари, у янги бюджет Будапешт учун “босим воситаси”га айланишини таъкидлади.
“Биз, венгрияликлар, уруш, иммиграция ва гендер тенглиги бўйича Брюссел сиёсатига бўйсунсаккина ўзимизга тегишли маблағни оламиз. Буни ҳеч қачон қабул қилмайман”, деди Орбан.
Шунингдек, у Брюсселга мурожаат қилиб, бюджет лойиҳасига қарши овоз беришини таъкидлади. Аммо бу сафар Орбаннинг позицияси Европа Иттифоқи қарорини тўхтата олмайди. Сабаби, ЕИ бюджети малакали кўпчилик овоз билан қабул қилинади. Шундай экан, Венгрия бош вазирининг қарори натижага таъсир кўрсатмайди.
ЕИ бюджети лойиҳаси
Европа комиссияси 16 июль куни 2028–2034 йиллар учун бюджет лойиҳасини эълон қилди. Унинг умумий ҳажми 1,98 триллион евро, бу амалдаги етти йиллик учун ажратилган 1,2 триллиондан анча юқори. Ушбу маблағнинг 100 миллиард евроси Украина учун ажратилади.
Бюджет лойиҳаси Венгрияда кескин норозиликка сабаб бўлди. Аввал Орбаннинг ўзи норозилик билдирди, кейин эса Венгрия Ташқи ишлар вазирлиги ҳам иттифоқни танқид қилди.
Изоҳ (0)