Сурия ҳукумати мамлакат жанубида жойлашган Сувайда шаҳри учун жанглар якунланганини маълум қилди. Друзлар ва бадавий қабилалар ўртасидаги низо сабаб ҳудуд қонли тўқнашувлар марказига айланган эди. Тахминан бир ҳафта олдин бошланган можаро мингга яқин сурияликнинг ҳаётига нуқта қўйди.
Манбаларга кўра, друзларга қарши жанг қилаётган қуролли гуруҳлар 19 июль куни шаҳарни ташлаб чиққан. Бунга Дамашқ ва Тель-Авив АҚШ воситачилигида эришган сулҳ сабаб бўлган. Сурия Ички ишлар вазирлиги вакили Нуредин ал-Баба ўзининг Telegram канали орқали баёнот бериб, “шаҳар бадавий жангчилардан тозалангани ва маҳаллаларда тўқнашувлар тўхтатилгани”ни маълум қилди.
Исроилнинг ҳаво ҳужумлари
Яҳудий давлати друз озчиликларни ҳимоялаш баҳонаси билан Сурия мудофаа ҳамда ички ишлар вазирлигининг Сувайда ҳудудидаги кучларига зарба берди. Бундан ташқари, Дамашқдаги президент саройи ва қуролли кучлар Бош штабини ҳам нишонга олди. Бу ҳукуматни ҳудуддан ўз аскарларини олиб чиқишга мажбур қилди. Шундан сўнг, узоққа чўзилмаган сулҳ имзоланди.
Оқ уй воситачилигидаги келишув
Қўшма Штатлар элчиси Том Барракнинг сўзларига кўра, Сурия президенти Аҳмад аш-Шараъа ва Исроил бош вазири Бенямин Нетаньяху АҚШ воситачилигида сулҳга келишган.
“Бу келишув Туркия ва Иордания томонидан ҳам қўллаб-қувватланди”, деган Баррак.
АҚШ давлат котиби Марко Рубио эса Суриядан “жангчиларни чеклашни, экстремистларнинг ҳудудга кириб қирғин уюштиришига йўл қўймаслик”ни талаб қилди.
“Биз барча жиноятлар учун, ҳатто ўз сафимиздагилар учун ҳам жавобгарликни талаб қиламиз”, деди давлат котиби.
Дамашқ томонидан эълон қилинган оташкесимга қарамай, Сувайданинг баъзи ҳудудларида жанглар давом этаётгани ҳақида хабарлар бор.
Изоҳ (0)