Озарбайжон раҳбари Шуша медиа форумида нутқ сўзлади. Илҳом Алиевдан ўз ҳудудий яхлитлигини тиклаган давлат президенти сифатида, украиналикларга қандай маслаҳат бериши сўралди. Бунга жавобан озарбайжонликлар етакчиси қуйидагиларни маълум қилди.
“Бу, менимча, украиналикларнинг интилишларига мос келади. Босқинни ҳеч қачон қабул қилманг. Бу асосий маслаҳат. Биз ҳам шундай қилдик”, деди Илҳом Алиев.
Алиев нутқи давомида ўз мамлакати тарихи ҳақида ҳам сўзлаб берди. Хусусан, биринчи Қарабоғ уруши Озарбайжон учун ниҳоятда оғир ва ҳалокатли бўлгани, кўплаб қурбонлар берилганини таъкидлади. Президент урушдан кейинги давр ҳам осон бўлмаганини қўшимча қилди.
“Иқтисодий нуқтаи назардан, бир миллион одам тирикчилик воситасидан айрилди. 700 мингдан ортиқ озарбайжонлик Қорабоғ минтақасидан қочиб келди. Шунингдек, Арманистонда яшаган 250 минг озарбайжонлик депортация қилинди”, деди президент.
Унинг сўзларига кўра, ўша вақтда мамлакат аҳолиси 8 миллион эди. Давлат энг юқори даражадаги қочқинлар кўрсаткичига эга бўлган. Қолаверса, бюджет бўш, халқаро ёрдам эса умуман берилмаган.
Президентнинг таъкидлашича, бундай шароитда ҳокимият тепасига Ҳайдар Алиев келиб, вазиятни барқарорлаштирган ва давлатни аста-секин оёққа қўйган.
“Биз аста-секин оёққа тура бошладик, ривожландик ва фақат битта нарсани ўйладик. Ишончим комилки, фуқароларимизнинг катта қисми менинг сўзларимга қўшилади. Биз босиб олинган ҳудудни қайтариш ҳақида ўйладик. Бу жуда қийин бўлишини тушунардик”, деди Алиев.
Орадан кўп ўтмай, мамлакат ўз ҳудудларини қайтаришга киришди. Алиевнинг айтишича, масалага дипломатик ечим топиш учун тузилган ОSCE Минск гуруҳи амалда Арманистонни қўллаб-қувватлаган ва статус-квони сақлаш учун барча чораларни кўрган. Бироқ Озарбайжон “вақтни чўзишга уринишлар”га тоқат қилмай, 2020 йили мустақил қарор қабул қилди.
“Биз янги ҳақиқатлар яратамиз ва сиз бунга кўникишга мажбур бўласиз, деб қарор қилдик. Шундай ҳам бўлди, биз 2020 йилда янги реалликларни яратишни бошладик. Улар бунга кўнишга мажбур бўлди, кейин эса 2023 йил сентябрьида амалиёт ўтказиб, масалани бир кунда ҳал қилдик. Шундай қилиб, мен саволга бир оз кенгроқ жавоб беряпман, аммо бу бошланғич фикримни очиб беради”, деди Алиев.
Жавобини якунлар экан, у асосий фикрни яна бир бор таъкидлади:
“Қайтиб айтаман: ҳеч қачон таслим бўлманг ва ҳудудий яхлитликнинг бузилишини қабул қилманг”.
Президентнинг таъкидлашича, жамият бирлиги яна бир муҳим омил бўлган:
“Жамиятнинг бирдамлиги менга президент ва бош қўмондон сифатида куч берди. Мен халқнинг мени қўллаб-қувватлашига ишондим. Бу, эҳтимол, ҳал қилувчи омил бўлди. Шундай қилиб, яна такрорлайман: ҳеч қачон таслим бўлманг”, деди Алиев.
Бир неча ой олдин Алиев урушлар фақат бир томон таслим бўлгандагина тугашини айтган эди. Унинг фикрича, сулҳ фақат қайта куч тўплаш ва ҳаракатни давом эттириш учун зарур холос.
Изоҳ (0)