Шу кунларда йўлларга ўрнатилган сунъий нотекисликлар билан боғлиқ муаммолар ижтимоий тармоқларнинг асосий мавзусига айланди. "Дарё" нашри бундай тўсиқлар ўрнатилиш сабаби ва уларнинг аҳамияти борасида халқ фикри билан қизиқди.
Сунъий нотекислик — бу йўл қисмида йўл ўқига перпендикуляр тарзда жойлашган, тезликни мажбурий пасайтириш учун мўлжалланган махсус баландлик ҳисобланади. Сўнгги пайтларда ҳайдовчи ва тинч аҳоли орасида кўплаб муҳокамаларга сабаб бўлмоқда. Мисол учун, пойтахтнинг биргина Яшнаобод туманида жойлашган “Маҳмур” маҳалласидаги биргина кўчанинг ўзида 8 та ана шундай сунъий тўсиқлар ўрнатилган. Муаммонинг илдизини аниқлаш учун маҳалла фуқаролари ва ҳайдовчилар фикри ўрганилди.
“Ҳамма ўз ҳисобидан қўйган, чунки машиналарнинг овози, шовқинидан уйда ўтириб бўлмай қолди. Ҳайдовчилар ёқилғини тежаш учун 200 метр наридаги катта йўл қолиб, маҳаллани ичидан юришади”, дейди Таиса Владимировна исмли маҳалла фаоли.
Шу ҳудудда истиқомат қилувчи Малоҳат Абдураҳмонованинг айтишича, бир неча бор ҳокимиятга мурожаат қилгани, бироқ охир-оқибат сунъий нотекисликларни ўз ҳисобидан ўрнатишга мажбур бўлганини айтди.
Бошқа фуқаролар ҳам шу каби фикрларни билдирди. Аксарияти бу каби “лежачий полицейский”лар болалар хавфсизлиги, ёши катта инсонлар тинчлигини таъминлаш мақсадида ўрнатилганини таъкидлаб ўтди.
Ҳайдовчилар эса бошқача фикрда. Улар бу каби сунъий дўнгликлар машиналарни носоз ҳолатга келтиришидан ташвишда.
“Машинани амортизаторини тўкиб ташлайди-ку, ахир. Ундан кейин кўпчилик кредитга машина олиб ҳайдаяпти, бизга ҳам осон эмас”, дейди Эргаш Абдусаидов исмли ҳайдовчи.
Яна бир ҳайдовчи — Исмоил Исоқов эса сунъий нотекисликларнинг ҳаддан ортиқ кўплигидан ёзғирди.
“Ҳаддан ташқари кўп қўйишган. Маҳаллага бегоналар кирмайди, таксистлар кирмаса. Ҳар 100 метрга қўйган тақдирда ҳам тезликни соатига 100 километрга чиқара олмайди машина”, дейди у.
Бу борадаги фикрларингизни ёки сизни қийнаётган муаммоларни изоҳларда ёзиб қолдиринг.
Изоҳ (0)