Арне Слот бошқарувидаги “Ливерпуль” ёзги трансферлар ойнасида ҳужум чизиғини кучайтиришга киришди. Клуб Германиянинг “Айнтрахт” жамоасида тўп сураётган 23 ёшли ҳужумчи Уго Экитике билан шартнома бўйича тўлиқ келишувга эришган. Бу ҳақда футбол журналисти Фабрис Хоакин ўзининг ижтимоий тармоқлардаги саҳифасида маълум қилган.
Манбаларга кўра, мерсисайдликлар франциялик футболчи билан олти йиллик шартнома борасида келишган. Экитике айнан “Ливерпуль” сафида тўп суришни истагани сабабли унга қизиқиш билдирган “Ньюкасл” билан музокараларни тўхтатган.
BBC хабарига кўра, “Ливерпуль” ушбу трансферни дам олиш кунига қадар расмийлаштириб, ҳафта охиригача эълон қилиши мумкин. Аввалроқ “Айнтрахт” Экитике учун “Ньюкасл” таклиф қилган 70 миллион фунт стерлинг (81 миллион евро) миқдоридаги таклифни рад этганди. Шу боис, “Ливерпуль”нинг таклифи ундан юқори бўлиши кутилмоқда. Баъзи манбаларда битим қиймати 100 миллион еврога етиши мумкинлиги таъкидланмоқда.
Уго Экитике фаолиятини Франциянинг “Реймс” клубида бошлаган. Кейинчалик “ПСЖ” сафида ҳам ўйнаган ҳужумчи ҳозирда Бундеслигадаги энг истиқболли ёш футболчилардан бири ҳисобланади. Ўтган мавсумда у “Айнтрахт” сафида лига доирасидаги 33 та ўйинда майдонга тушиб, 15 та гол муаллифига айланган. Transfermarkt портали Экитикенинг қийматини 75 миллион еврога баҳолаган.
Изоҳ (0)