Латвия ҳукумати 841 нафар Россия фуқаросидан Европа Иттифоқининг янги доимий резиденти мақомини олиш учун ҳужжат топширмаганлиги сабабли мамлакатни тарк этишни талаб қилди. Бу ҳақда Фуқаролик ва миграция бошқармаси маълум қилди.
“Иммиграция тўғрисидаги қонунга киритилган ўзгартиришлар асосида Россиянинг 841 нафар фуқаросининг доимий яшаш учун рухсатномаси муддати тугаган. Бунга сабаб, улар 30 июнгача Европа Иттифоқининг узоқ муддатли резиденти мақомини олиш учун ариза топширишга зарур ҳужжатларни тақдим этишмаган. Мазкур шахслар 30 ноябрга қадар Латвия Республикаси ҳудудини тарк этишлари шарт”, дея таъкидланади баёнотда.
Бундай талаб 2024 йил 20 июндан кучга кирган Латвиянинг Иммиграция тўғрисидаги қонунига киритилган ўзгартиришлар билан боғлиқ.
Янги қоидаларга кўра, Латвия ҳудудида доимий яшовчи ва доимий яшаш учун рухсатномага эга бўлган Россия фуқаролари нафақат янги мақом учун ҳужжат топширишлари, балки латиш тилидан ҳам имтиҳон топширишлари лозим эди.
Июнь ойида Латвия ҳукумати Россия ва Беларусь фуқароларига мамлакатда кўчмас мулк сотиб олишни тақиқлаган эди. Қонун Россия ёки Беларусда рўйхатдан ўтган юридик шахсларга, шунингдек, улар бенефициар ҳисобланадиган устав капиталининг камида 25 фоиз акцияларига эгалик қилувчи фуқароларга тааллуқли. Бундан ташқари, янги қоида Россия Федерацияси ва Беларусь юридик тузилмаларига ҳам татбиқ этилади.
Бундан аввал Латвия ҳукумати давлат хизматчиларининг Россия ва Беларусга боришини чекловчи қонунни қабул қилди. Чекловлар ҳарбий хизматчилар, судьялар, вазирлар, маҳаллий депутатлар, дипломатлар ва “муҳим инфратузилма хавфсизлиги учун масъул шахслар”га ҳам тааллуқли бўлади.
Май ойида Латвия сейми (парламенти) депутатларга идора биносида рус тилидан фойдаланишни тақиқловчи ва уларни латиш тилида сўзлашга мажбурловчи ўзгартишларни қабул қилди. Латвия сейми (парламенти) депутатларга идора биносида рус тилидан фойдаланишни тақиқловчи ва уларни латиш тилида сўзлашга мажбурловчи ўзгартишларни қабул қилди
Изоҳ (0)